STOK UYAH DI KOTA SUKABUMI AMAN JEUNG CUKUP PIKEUN NYUMPONAN KABUTUHAN WARGA MASARAKAT

Reporter : ENDANG SUMARDI

Walikota Sukabumi, H. Mohamad Muraz, S.H., M.M. nandeskeun, stok Uyah di Kota Sukabumi masih aman jeung cukup pikeun nyumponan kabutuhan warga masarakat. Ngan dina sajero kurang leuwih dua minggu ka tukang, hargana di pasar tradisonal di Kota Sukabumi undak luhur pisan, nya éta ngahontal 200 nepi ka 300 peresén. Saterusna ditandeskeun, sok sanajan harga Uyah di Kota Sukabumi undak luhur pisan, tapi teu mangaruhan kana kahirupan jeung paékonomian warga masarakat, lantaran kabutuhan Uyah di satiap kulawarga teu loba saperti kabutuhan poko séjénna. Sabab satiap kulawarga rata-rata ngan ukur meuli Uyah sakali, pikeun nyumponan kabutuhan sabulaneun. Anu penting Uyahna aya jeung bisa dibeuli ku warga masarakat.

Lian ti éta ogé ditandeskeun, undakna harga Uyah téh masih dina wates kawajaran, sarta masih kadongkang ku sakumna lapisan warga masarakat. Ngan hanjakal undakna luhur pisan, nya éta tina harga écéran anu asalna Rp. 500,00 jadi Rp. 1.500,00 nepi ka Rp. 2.000,00. Leuwih jauh Walikota Sukabumi nandeskeun, masalah undakna harga Uyah téh, geus dibahas sacara nasional, sabab geus jadi masalah nasional. Lian ti éta, usaha pikeun ngadalikeun harga Uyah téh, geus jadi wewenang Pamaréntah Puseur.

Disagigireun ti éta Walikota Sukabumi ogé nandeskeun, Pamaréntah Kota Sukabumi teu bisa ngadalikeun pasokan jeung harga Uyah. Sabab di Kota Sukabumi taya pausahaan anu bagerak dina widang produksi Uyah, tapi ngan ukur meunang pasokan ti daérah séjén. Anu jadi masalah ku undakna harga Uyah téh, nya éta di tempat-tempat produsén Uyahna, kunaon hargana bisa undak luhur pisan.

Sedengkeun Kapala Diskop UKM-PP (Dines Koprasi, Usaha Kecil Menengah, Perdagangan jeung Perindustrian) Kota Sukabumi, Drs. Ayép Supriatna, M.M. ngajelaskeun, harga barang-barang poko jeung barang-barang penting strategis séjénna di Kota Sukabumi rélatif stabil, sarta fluktuasi hargana masih dina wates kawajaran. Salajuna dijelaskeun, stok barang-barang kabutuhan poko jeung barang-barang penting strategis séjénna, di Kota Sukabumi cukup pikeun nyumponan kabutuhan warga masarakat, sarta dina nyalurkeun jeung ngadistribusikeun éta barang-barang téh, salawasna dina kaayaan aman jeung lancar.