POSYANDU TÉH NGARUPAKEUN SALA SAHIJI WADAH PIKEUN NGABERDAYAKEUN MASARAKAT

Reporter : ENDANG SUMARDI

Wakil Walikota Sukabumi, H. Achmad Fahmi, S.Ag., M.M.Pd. nandeskeun, Posyandu téh ngarupakeun sala sahiji wadah ilubiung jeung pikeun ngaberdayakeun masarakat, hususna dina panyalagaraan pangwangunan kaséhatan, atikan jeung ékonomi, lantaran dikalola ti, pikeun jeung ku masarakat, dina usaha nyiptakeun jeung ngagampangkeun masarakat, pikeun meunang palayanan kaséhatan dasar, atikan dini jeung kabutuhan hirup minimal.

Ěta panandesan Wakil Walikota Sukabumi téh, ditepikeun basa ngabagéakeun jeung narima sacara resmi kadatangan Tim Réchéking Panarima Révitalisasi Posyandu Award Propinsi Jawa Barat Taun 2017, anu diketuaan ku Drs. R. Julianto, cindekna tanggal 15  Agustus 2017, di Rohangan Utama Balé Kota Sukabumi.

Salian ti éta ogé ditandeskeun, sala sahiji wujud nyata ngabina anu dilaksanakeun ku Pamaréntah Kota Sukabumi ka Posyandu, diantarana ku cara nyumponan sacara nungtut kabutuhan sarana jeung fasilitas, kaasup latihan téknis jeung administratif pikeun para kader sarta bantuan waragad oprasional pikeun Posyandu jeung Pokjanal (Kelompok Kerja Oprasional) Posyandu.

Wakil Walikota Sukabumi ngaharepkeun, rupa-rupa usaha anu geus dilaksanakeun ku sakumna komponén masarakat jeung Pamaréntah Kota Sukabumi dina ngalaksanakeun révitalisasi sakaligus ngaronjatkeun jeung ngamekarkeun Posyandu di Kota Sukabumi, meunang pangakuan jeung pangajén ti Pamaréntah Propinsi Jawa Barat, pikeun bahan motivasi masarakat jeung Pamaréntah Kota Sukabumi, malar salawasna usaha satékah polah jeung leuwih hadé deui dina mangsa-mangsa nu bakal datang, hususna dina ngalaksanakeun révitalisasi sakaligus ngaronjatkeun jeung ngamekarkeun Posyandu di Kota Sukabumi.

Hadir dina kasempetan éta, Asistén Paékonomian jeung Pangwangunan Setda Kota Sukabumi, H. Dédén Soléhudin, S.Ag., M.M., salaku Ketua Pokjanal Posyandu Kota Sukabumi, para Kapala OPD (Organisasi Parangkat Daérah) sarta instansi jeung lembaga nu aya kakaitannana.