PERSIDÉN RI NGALAKSANAKEUN SHOLAT IDUL ADHA TAUN 1438 HIJRIYAH DI KOTA SUKABUMI

Reporter : ENDANG SUMARDI

Persidén RI, Ir. H. Joko Widodo katut Ibu Nagara, Hj. Iriana Joko Widodo, sarta para Mentri, Staf Kapersidénan RI, Anggota DPR RI, Gubernur Jawa Barat katut Unsur Forkopinda (Forum Komunikasi Pingpinan Daérah) Propinsi Jawa Barat, Walikota Sukabumi, Wakil Walikota Sukabumi, Pingpinan katut Anggota DPRD Kota Sukabumi, Kapala Setukpa Lemdiklat Polri Sukabumi, Unsur Forkopinda Kota Sukabumi, Sekertaris Daérah Kota Sukabumi, Ketua katut Wakil Ketua TP PKK sarta Ketua DWP (Dharma Wanita Persatuan) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah) katut Instansi Vértikal, para Sesepuh, Alim Ulama, Tokoh Masarakat, Wanoja jeung Pamuda, sarta puluhan rébu umat Islam séjénna Kota Sukabumi, ngalaksanakeun Sholat Idul Adha Taun 1438 Hijriyah di Lapangan Merdéka Kota Sukabumi, cindekna poé Juma’ah isuk, 1 Séptémber 2017. Anapon anu jadi Iman, nya éta K.H. Mahfud Ghozali, sarta anu jadi Khotib, Ketua Umum MUI (Majelis Ulama Indonésia) Kota Sukabumi, Prof. Dr. K.H. Dédi Ismatullah Machdi, S.H., M.Hum.

Dina biantarana Persidén RI ngajelaskeun, pangwangunan Jalan Tol Bocimi (Bogor – Ciawi – Sukabumi) ditargétkeun réngsé dina taun 2019 nu bakal datang. Tah kulantaran kitu, Persidén RI terus ngalanglang sarta nalingakeun pangwangunan éta jalan, sangkan dina taun 2019 nu bakal datang bisa ngawujud jeung bisa digunakeun ku warga masarakat.

Lian ti éta ogé dijelaskeun, Karéta jurusan Sukabumi – Bogor ritna baris ditambah, sarta Kareta jurusan Sukabumi – Cianjur baris diteruskeun ti Cianjur nepi ka Bandung, kalayawan ka hareupna, Rél Karéta jurusan Sukabumi – Bogor baris dijieun 2 track atawa 2 jurusan. Salajuna dijelaskeun, di wewengkon Sukabumi ogé baris diwangun Bandar Udara, ngan masalah tempatna can saklek, sabab masih kénéh diaji jeung ditimbang-timbang.

Saréngséna ngalaksanakeun Sholat Idul Adha, Persidén RI katut rombongan langsung ngajugjug Buruan Masjid Agung Kota Sukabumi, nya éta masrahkeun Héwan Qurban Sapi Limosin anu beuratna 1,4 ton, ka Panitia Héwan Qurban Masjid Agung Kota Sukabumi. Salajuna masrahkeun Sembako jeung Héwan Qurban Sapi, ka warga masarakat RW 01 Kalurahan Kebonjati, Kacamatan Cikolé, Kota Sukabumi, jeung ka warga masarakat RW 05 Kalurahan Tipar, Kacamatan Citamiang, Kota Sukabumi, masing-masing 1.000 pakét Sembako jeung hiji Sapi.