SATIAP OPD DI KOTA SUKABUMI SABAN POÉ SENÉN NGALAKSANAKEUN UPACARA PANGIBARAN BENDÉRA MÉRAH PUTIH

Reporter : ENDANG SUMARDI

Satiap OPD (Organisasi Parangkat Daérah) kaasup Kacamatan, Kalurahan jeung Lembaga Pendidikan di satiap tingkatan, sarta BUMN jeung BUMD di Kota Sukabumi, satiap minggu cindekna dina saban poé Senén isuk, ngalaksanakeun Upacara Pangibaran Bendéra Mérah Putih, ti mimiti poé Senin, 4 Séptémber 2017. Anapon anu jadi Inspéktur Upacara dina Upacara Pangibaran Bendéra Mérah Putih poé Senén, 4 Séptémber 2017 di Tingkat Setda Kota Sukabumi kaasup Diskominfo (Dines Komunikasi jeung Informatika) Kota Sukabumi, Dispusip (Dines Perpustakaan jeung Kaarsipan) Kota Sukabumi, BPKD (Badan Pangalolaan Kauangan Daérah) Kota Sukabumi sarta BKPSDM (Badan Kapagawéan jeung Pangembangan Sumber Daya Manusa) Kota Sukabumi, nya éta Sekertaris Daérah Kota Sukabumi, Dr. H.M.N. Hanafie Zain, M.Si.

Dina biantarana Sekertaris Daérah Kota Sukabumi ngajelaskeun, dilaksanakeunana Upacara Pangibaran Bendéra Mérah Putih satiap minggu cindekna dina saban poé Senén isuk di Kota Sukabumi téh, luyu jeung Surat Ědaran ti Kemendagri (Kementrian Dalam Negri) RI Nomer : 015.1/3506/SJ, yén ti mimiti tanggal 4 Séptémber 2017, satiap OPD kaasup Kacamatan, Kalurahan jeung Lembaga Pendidikan di satiap tingkatan, sarta BUMN jeung BUMD, wajib ngalaksanakeun Upacara Pangibaran Bendéra Mérah Putih dina satiap minggu cindekna dina saban poé Senén isuk, sarta anu jadi Pembina Upacarana nya éta Kapala OPD, Camat, Lurah jeung Kapala Sakola, sarta Pingpinan atawa Diréktur BUMN jeung BUMD masing-masing. Ngan saupama dina sala sahiji minggu aya tanggal 17 atawa aya tanggal Pangéling-ngéling Hari Besar Nasional, éta Upacara Pangibaran Bendéra Mérah Putih téh cukup dilaksanakeun dina tanggal 17 atawa tanggal Pangéling-ngéling Hari Besar Nasional.

Sekertaris Daérah Kota Sukabumi nandeskeun, satiap OPD kaasup Kacamatan, Kalurahan jeung Lembaga Pendidikan di satiap tingkatan, sarta BUMN jeung BUMD di Kota Sukabumi, wajib ngalaporkeun palaksanaan Upacara Pangibaran Bendéra Mérah Putih satiap bulan sakali ka Walikota Sukabumi, ngaliwatan Sekertaris Daérah Kota Sukabumi, c.q. Bagian Humas jeung Protokol Setda Kota Sukabumi.

Nyigeung jumlah pagawé di lingkungan Setda Kota Sukabumi kaasup Diskominfo Kota Sukabumi, Dispusip Kota Sukabumi, BPKD Kota Sukabumi sarta BKPSDM Kota Sukabumi anu miluan Upacara Pangibaran Bendéra Mérah Putih dina poé Senén, 4 Séptémber 2017, sakumaha anu dijelaskeun ku Sekertaris Daérah Kota Sukabumi kawilang réa pisan, nya éta leuwih ti 95 peresén. Anapon pagawé nu teu miluan Upacara Pangibaran Bendéra Merah Putih dina poé Senén, 4 Séptémber 2017 téh, saméméhna geus méré iber jeung alesanana bisa dipertanggungjawabkeun, saperti gering, dines luar jeung cuti ngalaksaksanakeun ibadah haji.

Tah kulantaran kitu, Sekertaris Daérah Kota Sukabumi ngahaturkeun nuhun jeung pangajén anu saluhur-luhurna ka sakumna pagawé anu milu Upacara Pangibaran Bendéra Mérah Putih dina poé Senén, 4 Séptémber 2017, sakaligus ngaharepkeun, sangkan Upacara Pangibaran Bendéra Mérah Putih téh salawasna diiluan ku sakumna pagawé di satiap OPD kaasup Kacamatan, Kalurahan jeung Lembaga Pendidikan di satiap tingkatan, sarta BUMN jeung BUMD di Kota Sukabumi, lantaran geus jadi sala sahiji kawajiban pikeun satiap pagawé.