IMAH MA CACIH GEUS RÉNGSÉ DIWANGUN

Reporter : ENDANG SUMARDI

Imah Ma Cacih, warga Kampung Situawi RT 02 RW 02, Kalurahan Karang Tengah, Kacamatan Gunung Puyuh, Kota Sukabumi, geus réngsé diwangun. Ěta imah téh ukuran 6 kali 10 metér, anu ngawengku dua kamar saré, hiji rohangan tamu, hiji kamar mandi jeung dapur. Dandim (Komandan Distrik Militér) 0607 Kota Sukabumi, Létkol Inf. Mohammad Mahfud As’at, S.IP. ngajelaskeun, imah milik Ma Cacih téh, saméméhna diwangun jeung dijieun tina bilik, sarta kaayaanana matak ngahariwangkeun sabab geus nyanggéyéng arék runtuh. Tapi ayeuna mah geus réngsé diwangun deui sacara permanén, ku Korem (Komando Resort Militér) 061 Suryakencana Bogor, kaasup waragad séwa tanahna salila 5 taun, anu pamustunganana kaayaan éta imah téh jadi leuwih weweg jeung aman, sarta séhat jeung matak genah pikeun dicicinganana.

Ngan sok sanajan imah Ma Cacih téh geus réngsé diwangun, tapi pihak Kodim 0607 Kota Sukabumi ngararancang pikeun dicicinganana dina Poéan Tepung Taun Ka 72 TNI, anu titimangsana tanggal 5 Oktober 2017 nu bakal datang, sabagé kado ti TNI ka Ma Cacih. Salain ti éta ogé dijelaskeun, Rutilahu (Rumah Tidak Layak Huni) di wewengkon Kota Sukabumi téh masih réa. Tah kulantaran kitu, Kodim 0607 Kota Sukabumi baris ngalaksanakeun program ngoméan jeung ngawangun Rutilahu réana 360 unit di wewengkon Kota Sukabumi, luyu jeung slogan TNI, nya éta Bareng jeung Rahayat TNI Kuat. Salajuna dijelaskeun, éta program téh kakara rék dimimitian dina taun 2017 ieu, sarta pangwangunan imah milik Ma Cacih téh, ngarupakeun program ngoméan jeung ngawangun Rutilahu munggaran, anu dilaksanakeun ku TNI.

Leuwih jauh Dandim 0607 Kota Sukabumi ngajelaskeun, éta program ngoméan jeung ngawangun Rutilahu téh, ngarupakeun sala sahiji wujud nyata kapedulian TNI ka warga masarakat. Tah kukituna, Pangdam (Panglima Daérah Militér) III Siliwangi sarta Danrem (Komandan Resort Militér) 061 Suryakencana Bogor, maréntah Kodim 0607 Kota Sukabumi, pikeun ngabantu warga masarakat, ku cara ngoméan jeung ngawangun Rutilahu warga masarakat. Disagigireun ti éta, Dandim 0607 Kota Sukabumi ogé miharep ka Ma Cacih sarta ka sakumna kulawargana, sangkan nyicingan éta imah sakaligus ngaraksa jeung ngariksa éta imah sahadé-hadéna, malar éta imah téh bisa awét.

Sedengkeun Ma Cacih anu dina danget ieu cicing di Kamar Nomer 222 Rusunawa (Rumah Susun Sederhana Séwa) Kota Sukabumi, Jalan Lingkar Selatan, Kalurahan Sukakarya, Kacamatan Warudoyong, Kota Sukabumi, ngajelaskeun ngarasa bagja jeung gumbira anu taya papadana, ku geus réngsé imahna diwangun téh. Tah kulantaran kitu, Ma Cacih ngahaturkeun rébu nuhun ka sakumna pihak, boh ka sakumna lapisan warga masarakat boh ka Pamaréntah Kota Sukabumi katut Sekertaris Daérah Kota Sukabumi, Dr. H.M.N. Hanafie Zain, M.Si., sarta ka Pamaréntah Kacamatan Gunung Puyuh jeung Kalurahan Karang Tengah, anu geus ngabantu méré bantuan natura jeung nempatkeun dirina di Rusunawa Kota Sukabumi. Leuwih-leuwih ka aparat TNI, anu geus ngabantu ngawangun imah milikna, anu pamustunganana jadi leuwih weweg jeung aman, sarta séhat jeung matak genah dicicinganana.