KOTA SUKABUMI MEUNANG LAYANG PANGAJÉN GERAKAN NUJU 100 SMART CITY TAUN 2017

Reporter : ENDANG SUMARDI

Kota Sukabumi meunang layang pangajén sabagé kota pang hadéna dina ngalaksanakeun Gerakan Nuju 100 Smart City di Indonésia Taun 2017. Ěta layang pangajén téh dipasrahkeun ku Kapala Kantor Staf Kapersidénan RI, Tétén Masduki, ka Kapala Dines Kominfo (Komunikasi jeung Informatika) Kota Sukabumi, Drs. H. Gabril Sukarman, M.Pd., ngawakilan Walikota Sukabumi, H. Mohamad Muraz, S.H., M.M., dina acara Seminar jeung Malem Panganugrahan Gerakan Nuju 100 Smart City Taun 2017, cindekna tanggal 15 Novémber 2017, di Hotel Santika Hayam Wuruk Jakarta, babarengan jeung Kabupatén katut Kota séjénna. Kagiatan éta téh dibuka sacara resmi ku Mentri Kominfo (Komunikasi jeung Informatika) RI, Rudiantara, S.Stat., MBA., sarta diiluan ku 24 Kota jeung Kabupaten sa Indonésia, anu kapilih dina tahap munggaran Gerakan Nuju 100 Smart City, jeung geus hasil nyusun Smart City Masterplan.

Dina kasempetan éta, Mentri Kominfo ngajelaskeun, sabagian gedé masarakat geus salah dina ngahartikeun Smart City, nya éta ngan ukur sabagé nyadiakeun alat TI (Téknologi Informasi) canggih atawa sababaraha aplikasi. Tah kulantaran kitu, Mentri Kominfo nandeskeun, yén parangkat TI atawa aplikasi mah ngan ukur ngarupakeun tool atawa alat. Sabab harti Smart City anu sabenerna nya éta cara anu cerdas dina ngalola daérah Kabupatén jeung Kota dina sagala widang. Sedengkeun aplikasi sipatna ngabantu usaha dina ngawujudkeun Smart City. Salajuna dijelaskeun, sanggeus sababaraha taun Kamentrian Kominfo saperti anu ngantepkeun Kabupatén jeung Kota sarta Propinsi dina ngalaksanakeun persepsi masing-masing ngeunaan Smart City, Kamentrian Kominfo jeung Kamentrian Dalem Negri katut Bappenas (Badan Perencanaan Pangwangunan Nasional), dina bulan Méi 2017 ngalaksanakeun assessment atawa pangajénan, ka Kabupatén jeung Kota dina ngalaksanakeun Gerakan Nuju 100 Smart City di Indonésia.

Lian ti éta ogé dijelaskeun, dumasar kana dokumén perencanaan anu disusun ku Dines Kominfo Kota Sukabumi, jeung saggeusna dilaksanakeun assessment ku para pakar ti rupa-rupa disiplin élmu, Kota Sukabumi asup kana 25 Kabupatén jeung Kota pang hadéna, anu baris didorong pikeun ngalaksanakeun Smart City jeung dijadikeun Bench Marking pikeun Kabupatén jeung Kota séjénna. Saterusna dijelaskeun, dumasar kana kana hasil analisis jeung saran ti para pangaping anu disiapkeun ku Kamentrian Kominfo, Kota Sukabumi netepkeun Quick Win ngaberdayakeun UKM (Usaha Kecil jeung Menengah), ngaliwatan subsidi Pamaréntah Kota Sukabumi, pikeun mayar bunga injeuman modal UKM ti BPR (Bank Perkreditan Rakyat) Kota Sukabumi jeung BMT (Baitul Maal wa Tamwil). Anapon bunga anu dijadikeun subsidi pikeun UKM di Kota Sukabumi téh, nya éta tina bunga deposito Pamaréntah Kota Sukabumi.

Leuwih jauh dijelaskeun, Quick Win anu dilaksanakeun ku Pamaréntah Kota Sukabumi téh, geus ampir lumangsung 6 taun, sarta digagas ku Walikota Sukabumi, H. Mohamad Muraz, S.H., M.M., ti masih kénéh ngajabat Sekertaris Daérah Kota Sukabumi, anu dirojong ku panggunaan aplikasi jeung parangkat téknologi informasi séjénna, kalayan dijadikeun bagian tina sistim Smart City Kota Sukabumi. Tah kulantaran kitu, Bappeda (Badan Perencanaan Pangwangunan Daérah) Kota Sukabumi jeung Dines Kominfo Kota Sukabumi, babarengan nyusun dokumén rarancang Smart City, nya éta mangrupa buku Master Plan jeung Quick Win pikeun 15 taun ka hareup.

Disagigireun ti éta ogé dijelaskeun, inti tina éta dokumén téh geus ditepikeun ku Walikota Sukabumi dina Seminar jeung Panganugrahan Gerakan Nuju 100 Smart City di Indonésia Taun 2017, anu diiluan ku 24 Bupati jeung Walikota sa Indonésia, sarta diajén pang hadéna dina ngalaksanakeun Smart City, sanggeus aya hiji daérah anu dina pajalananana dinyatakeun gugur. Sedengkeun pikeun Propinsi Jawa Barat anu lolos jeung meunang layang pangajén Gerakan Nuju 100 Smart City di Indonésia Taun 2017 téh, nya éta Kota Sukabumi, Kota Bandung, Kota Cirebon, Kota Bekasi jeung Kota Bogor.