KOTA SUKABUMI SALAWASNA HASIL NYANGKING LAYANG PANGAJÉN DINA RUPA-RUPA WIDANG

Reporter : ENDANG SUMARDI

Kapala Dines Kominfo (Komunikasi jeung Informatika) Kota Sukabumi, Drs. H. Gabril Sukarman, M.Pd. ngajelaskeun, Kota Sukabumi salawasna hasil nyangking layang pangajén dina rupa-rupa widang, boh di Tingkat Propinsi Jawa Barat boh di Tingkat Nasional. Anapun layang pangajén anu anyar-anyar ieu hasil dicangking ku Kota Sukabumi téh, diantarana layang pangajén sacara pribadi, nya éta Walikota Sukabumi, H. Mohamad Muraz, S.H., M.M., meunang layang pangajén pang luhurna ti Persidén RI, mangrupa Anugrah Tanda Kahormatan Satyalancana Karya Bhakti Praja Nugraha Taun 2017 jeung Anugrah Pandu Negri Taun 2017 ti IIPG (Indonésia Institute for Publik Govermance), cindekna tanggal 10 Nopémber 2017, sarta Kota Sukabumi hasil nyangking layang pangajén sabagé kota pang hadéna dina ngalaksanakeun Gerakan Nuju 100 Smart City di Indonésia Taun 2017 ti Mentri Kominfo RI, cindekna tanggal 15 Nopémber 2017.

Saterusna dijelaskeun, rupa-rupa layang pangajén anu hasil dicangking sacara pribadi ku Walikota Sukabumi téh, ngarupakeun pangaruh tina rupa-rupa prestasi anu hasil dicangking ku Kota Sukabumi dina rupa-rupa widang. Kitu deui layang pangajén sabagé kota pang hadéna dina ngalaksanakeun Gerakan Nuju 100 Smart City di Indonésia Taun 2017, ngarupakeun hasil gawé anu rancagé sakumna pihak, boh aparatur di lingkungan Pamaréntah Kota Sukabumi boh sakumna lapisan warga masarakat Kota Sukabumi, hususna para pagawé Dines Kominfo Kota Sukabumi, anu salawasna usaha satékah polah ngawujudkeun Gerakan Nuju 100 Smart City, sok sanajan anggaran Dines Kominfo Kota Sukabumi téh kawilang pang leutikna, saupama dibandingkeun jeung anggaran Dines Kominfo séjénna di Indonésia, nya éta ukur 1 per 15 peresénna.

Hal éta téh ditepikeun ku Kapala Dines Kominfo Kota Sukabumi, salaku Pembina Upacara, dina Upacara Pangibaran Bendera Nagara Sang Mérah Putih, cindekna tanggal 20 Nopémber 2017, di Buruan Apél Setda Kota Sukabumi. Sedengkeun nu jadi Perwira Upacara, nya éta Kapala Widang Infrastruktur TIK (Téknologi, Informasi jeung Komunikasi), Pasandian jeung Integrasi Data Dines Kominfo Kota Sukabumi, H. Yuli Noviawan, S.T., M.T., Cadangan Perwira Upacara, Kapala Widang Komunikasi jeung Statistik Dines Kominfo Kota Sukabumi, Tantan Sontani, S.IP., M.Si., Pamingpin Upacara, Kasi Pasandian Dines Kominfo Kota Sukabumi, Tatang, S.Ě., Cadangan Pamingpin Upacara, Aép Saépuloh, A.Md., Pamanggul Catur, Susi Cicili, nu Mawa Naskah Pancasila, Budi Hariyatna, nu Maca Naskah Pancasila, Pembina Upacara, nu Maca Naskah Pembukaan Undang-Undang Dasar 1945, Kasi Pangalolaan Data Statistik Dines Kominfo Kota Sukabumi, Dicky Faizal Rahmat, S.IP., nu Maca Naskah Panca Prasetya Korpri, Linda Damayanti, S.Kom., nu Ngibarkeun Bendera, PLT Kasi Infrastruktur TIK (Téknologi Informasi jeung Komunikasi) Dines Kominfo Kota Sukabumi, Gian Purnama, S.T., Aléx Wijaya jeung Mh. Ělga Algiansyah, A.Md., sarta nu Maca Doa, Hari Guntara.

Hadir dina kasempetan éta, para Asistén Daérah Setda Kota Sukabumi. para Kapala OPD (Organisasi Parangkat Daérah), para Kapala Bagian jeung Kapala Widang, para Kasi jeung Kasubbag sarta para pagawé di lingkungan Setda Kota Sukabumi, Dines Kominfo Kota Sukabumi, BPKD (Badan Pangalolaan Kauangan Daérah) Kota Sukabumi, sarta Dispusip (Dines Perpustakaan jeung Kaarsipan) Kota Sukabumi.