WALIKOTA SUKABUMI NGAHATURKEUN NUHUN KA SEKERTARIS DAÉRAH KOTA SUKABUMI

Reporter : ENDANG SUMARDI

Walikota Sukabumi, H. Mohamad Muraz, S.H., M.M., kalayan asmana pribadi katut Kapala Daérah sarta pamaréntah jeung warga masarakat Kota Sukabumi, ngahaturkeun nuhun katut pangajén anu saluhur-luhurna ka Sekertaris Daérah Kota Sukabumi, Dr. H.M.N. Hanafie Zain, M.Si., kana sagala rupa pangabdian salila mancén gawé di lingkungan Pamaréntah Kota Sukabumi. Hal éta téh ditepikeun, lantaran Sekertaris Daérah Kota Sukabumi téh baris purna bhakti atawa pangsiun, cindekna ti mimiti tanggal 1 Désémber 2017 ieu. Salajuna dijelaskeun, Sekertaris Daérah Kota Sukabumi téh, mancén gawé di lingkungan Pamaréntah Kota Sukabumi ti mimiti taun 1966 anu geus kalarung, sarta ku gawé anu rancagé jeung disipilin anu luhur dina ngalaksanakeun pancén gawé, bisa ngahontal karir jeung kalungguhan pang luhurna, nya éta sabagé Sekertaris Daérah Kota Sukabumi.

Ěta hal téh ditepikeun dina acara Malem Tasyakur Bi Nikmat Milang Kala Ka 46 KORPRI (Korps Pagawé Républik Indonésia) Taun 2017 Tingkat Kota Sukabumi, anu direumbeuy ku acara Paturay Tineung Sekertaris Daérah Kota Sukabumi, cindekna tanggal 29 Nopémber 2017, di Gedong Juang 45 Kota Sukabumi, anu ditandaan ku Motong Tumpeng jeung Niup Lilin Kuéh Milang Kala ku Walikota Sukabumi, H. Mohamad Muraz, S.H., M.M., katut Wakil Walikota Sukabumi, H. Achmad Fahmi, S.Ag., M.M.Pd.

Salian ti éta, Walikota Sukabumi ogé ngawilujengkeun Milang Kala Ka 46 KORPRI Taun 2017 ka sakumna Anggota KORPRI di Kota Sukabumi, sakaligus ngaharepkeun, malar sakumna Anggota KORPRI di Kota Sukabumi bisa salawasna mancén gawé sacara hadé, hususna dina méré jeung ngaronjatkeun palayanan ka sakumna lapisan warga masarakat Kota Sukabumi dina rupa-rupa widang.

Sedengkeun Sekertaris Daérah Kota Sukabumi, Dr. H.M.N. Hanafie Zain, M.Si. ngajelaskeun, salila mancén gawé sabagé ASN (Aparatur Sipil Nagara) di lingkungan Pamaréntah Kota Sukabumi, salawasna usaha satékah polah ngalaksanakeun pancén gawé sacara hadé, dibarengan ku kaihlasan jeung loyalitas ka pingpinan. Disagigireun ti éta, Sekertaris Daérah Kota Sukabumi neda dihampura ka sakumna pagawé di lingkungan Pamaréntah Kota Sukabumi hususna ka Walikota Sukabumi, kana sagala rupa kakurangan jeung kahilapan, ti mimiti ucap, lampah jeung tindakan, boh sacara pribadi boh sacara kadinesan.

Hadir dina kasempetan éta, Pingpinan katut Anggota DPRD Kota Sukabumi, Unsur FKPD (Forum Komunikasi Pingpinan Daérah) Kota Sukabumi, Ketua katut Wakil TP PKK Kota Sukabumi, Ketua DWP (Dharma Wanita Persatuan) Kota Sukabumi, para mantén Walikota katut Wakil Walikota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah) jeung Instansi Vértikal, para Diréktur BUMD, para Camat jeung Lurah, sarta para pagawé di lingkungan Pamaréntah Kota Sukabumi jeung para tamu ondangan séjénna.