SALILA 4 TAUN IEU KOTA SUKABUMI NGARANDAPAN KALANGKAAN PATANI

Reporter : ENDANG SUMARDI

Sakumaha anu dijelaskeun ku Kapala DKP3 (Dines Katahanan Pangan, Patanian jeung Paikanan) Kota Sukabumi, Ir. Hj. Kardina Karsoedi, M.T., salila 4 taun ieu, Kota Sukabumi ngarandapan kalangkaan patani. Salian ti éta, ogé lega lahan tatanén di Kota Sukabumi terus ngurangan, akibat kamekaran jeung cepetna pangwangunan dina sagala widang.

Salajuna dijelaskeun, jumlah patani aktif di Kota Sukabumi anu ngagarap lahan tatanén di 33 kalurahan jeung 7 kacamatan sa Kota Sukabumi, geus teu saimbang deui jeung lega lahan tatanén nu aya dina danget ieu di Kota Sukabumi, nya éta salega 1.486 héktar. Sedengkeun jumlah patani di Kota Sukabumi dina danget ieu, dumasar kana data nu aya di DKP3 Kota Sukabumi ngan ukur aya 4.340 urang. Disagigireun ti éta ogé dijelaskeun, saupama jumlah patani di Kota Sukabumi dibandingkeun jeung lega lahan tatanén nu aya dina danget ieu di Kota Sukabumi geus teu idéal deui. Lantaran dumasar kana hasil itungan jeung évaluasi anu dilaksanakeun ku pihak DKP3 Kota Sukabumi, satiap patani ngan ukur mampuh ngagarap lahan tatanén kurang leuwih 0.3 héktar.

Nyigeung usaha pikeun narékahan jeung ngungkulan sakaligus nyegah terus ngurangannana lahan tatanén di Kota Sukabumi, nurutkeun Kapala DKP3 Kota Sukabumi, Pamaréntah Kota Sukabumi geus nerbitkeun Perda (Peraturan Daérah) Kota Sukabumi Nomor 1 Taun 2016 ngeunaan PLP2B (Perlindungan Lahan Pertanian Pangan Berkelanjutan). Ěta Perda téh geus diterapkeun salila sataun, sarta dina danget ieu keur disiapkeun peraturan turunannana, sangkan éta Perda téh bisa leuwih éféktif, hususna dina usaha mayungan jeung ngajaga lahan tatanén nu aya dina danget ieu di Kota Sukabumi, malah mandar teu dialihfungsikeun.

Saterusna dijelaskeun, ngurangannana lahan tatanén di Kota Sukabumi téh,  dina umumna nya éta lahan pasawahan, akibat dialihfungsikeun jadi kawasan pamukiman padumuk, patokoan jeung pangwangunan infrastruktur jalan, sala sahijina nya éta pangwangunan Jalan Lingkar Selatan. Leuwih jauh Kapala DKP3 Kota Sukabumi ngajelaskeun, ku geus ayana jeung diterapkeunnana Perda Kota Sukabumi Nomor 1 Taun 2016 ngeunaan PLP2B téh, sakira 321 héktar lahan tatanén di Kota Sukabumi geus ditetepkeun jadi LP2B (Lahan Pertanian Pangan Berkelanjutan), tina total lega lahan tatanén nu aya dina danget ieu di Kota Sukabumi, nya éta 1.486 héktar.