WEWENGKON KOTA SUKABUMI DINYATAKEUN SABAGÉ KLB DIFTÉRI

Reporter : ENDANG SUMARDI

Sanggeus saméméhna wewengkon Kabupatén Sukabumi ditetepkeun sabagé KLB (Kajadian Luar Biasa) Diftéri, kiwari giliran wewengkon Kota Sukabumi dinyatakeun sabagé KLB Diftéri. Tah kulantaran kitu, Walikota Sukabumi, H. Mohamad Muraz, S.H., M.M., langsung nginstruksikeun Dines Kaséhatan Kota Sukabumi, sangkan sagancangna ngalaksanakeun imunisasi massal atawa ORI (Outbreak Response Immunization), ka sakumna warga masarakat Kota Sukabumi, hususna ka budak umur 1 nepi ka 19 taun, sabagé sala sahiji usaha jeung tarékah pikeun ngungkulan KLB Diftéri di Kota Sukabumi. Lantaran wabah éta panyakit téh, kacida ngabahayakeunana pikeun warga masarakat.

Sedengkeun Kapala Dines Kaséhatan Kota Sukabumi, dr. Hj. Ritanénny Ědlien Silyena Mirah, dibarengan ku Kapala Widang P2P (Panyegahan jeung Pangadalian Panyakit) Dines Kaséhatan Kota Sukabumi, dr. Lulis Délawati ngajelaskeun, dinyatakeunnana wewengkon Kota Sukabumi sabagé KLB Diftéri téh, sabab nepi ka ahir taun 2017 kapanggih aya 3 urang warga masarakat Kota Sukabumi anu diduga katarajang panyakit diftéri. Tah ku sabab kitu, Pamaréntah Kota Sukabumi ngaliwatan Dines Kaséhatan Kota Sukabumi, ti mimiti bulan Januari 2018 ieu baris ngalaksanakeun imunisasi massal atawa ORI, luyu jeung instruksi Walikota Sukabumi.

Salajuna dijelaskeun, dina palaksanaan éta imunisasi massal téh, pihak Dines Kaséhatan Kota Sukabumi nargétkeun réana 100.000 leuwih warga masarakat Kota Sukabumi bisa miluan kana éta kagiatan. Tapi dina palaksanaan éta imunisasi téh, pamaréntah ngan ukur bisa méré imunisasi sacara haratis ka budak umur sataun nepi ka 19 taun wungkul, sabab kawatesanan ku waragad anu dipinda. Salian ti éta, Pamaréntah Puseur ogé ngan ukur bisa nyadiakeun obat jeung jarum suntikna wungkul. Sedengkeun pikeun nu séjénna, kudu ditanggung sapinuhna ku Pamaréntah Kota Sukabumi.

Disagigireun ti éta ogé dijelaskeun, panyakit diftéri téh nya éta panyakit inféksi nular, anu disababkeun ku baktéri corynebacterium diphtheriae. Ěta panyakit téh ngabogaan mangsa inkubasi 2 nepi ka 5 poé. sarta ngabogaan gejala saperti demam, batuk, sulit nelen, selaput bodas abu-abu, beuheung bareuh jeung hésé napas. Tah kulantaran kitu, éta panyakit téh bisa nyababkeun tilar dunya, saupama teu buru-buru diungkulan jeung diubaran. Saterusna dijelaskeun, pikeun warga masarakat anu diduga katarajang panyakit diftéri, baris sagancangna diungkulan jeung diubaran sacara husus. Leuwih jauh dijelaskeun, dina ngungkulan panyakit diftéri téh, pihak Dines Kaséhatan Kota Sukabumi baris ngalaksanakeun panyalidikan épidemiologi jeung méré obat prolilaksis ka satiap jalma anu pagiling gisik jeung jalma anu katarajang panyakit diftéri. Maksud jeung tujuanana, nya éta pikeun ngungkulan sakaligus nyegah nularna jeung nyebarna éta panyakit.