WEWENGKON PADET PADUMUK DI KOTA SUKABUMI GEUS DIRÉNGSÉKEUN KURANG LEUWIH 35 HÉKTAR

Reporter : ENDANG SUMARDI

Wewengkon padet padumuk di Kota Sukabumi, nepi ka ahir taun 2017 geus diréngsékeun kurang leuwih 35 héktar, tina sagemblengna wewengkon padet kurang leuwih 139,02 héktar. Kapala DPU-PRP-KPP (Dines Pekerjaan Umum, Panataan Rohang, Paimahan, Kawasan Pamukiman jeung Patanahan) Kota Sukabumi, Dr. Ir. H. Asép Irawan, M.Sc. ngajelaskeun, dina ngaréngsékeun éta wewengkon padet téh, dilaksanakeun ngaliwatan program Kotaku (Kota Tanpa Kumuh), sabagé sala sahiji usaha strategis Diréktorat Pangembangan Kawasan Pamukiman Ditjén (Diréktorat Jéndral) Cipta Karya Kamentrian PUPR (Pekerjaan Umum jeung Paimahan Rahayat) RI. Ěta program téh ngawengku NSUP (National Slum Upgrading Program) jeung NUSP-2 (Neighborhood Upgrading and Shelter Project Phase 2).

Salian ti éta ogé dijelaskeun, program NSUP taun 2017 di Kota Sukabumi ngahontal 15 kalurahan, nya éta Kalurahan Karangtengah, Gunungpuyuh, Karamat, Cikolé, Kebonjati jeung Kalurahan Selabatu, sarta Kalurahan Citamiang, Nanggeléng, Sudajayahilir, Cibeureumhilir, Jayaraksa, Jayamekar, Baros, Nyomplong jeung Kalurahan Bénténg. Sedengkeun program NUSP-2 ngahontal 12 kalurahan, anu ngawengku Kalurahan Sukakarya, Gedongpanjang, Cipanengah, Tipar jeung Kalurahan Cikondang, sarta Kalurahan Situmekar, Warudoyong, Sriwidari, Cisarua, Sindangpalay, Limusnunggal jeung Kalurahan Subangjaya. Tah kukituna, sagemblengna kalurahan anu diwangun dina taun 2017 di Kota Sukabumi  ngaliwatan program Kotaku téh ngahontal 27 kalurahan, anu sasaran pangwangunannana nya éta pangwangunan jalan lingkungan, séptic tank komunal, drainaseu jeung sarana cai bersih.

Sabagé sala sahiji contohna di RT 2 RW 5 Kalurahan Warudoyong anu asup kana program NUSP-2 taun 2017, diwangun jalan lingkungan, dingding susukan jeung séptic tank komunal. Anapon prosés pangwangunannana dimimitian dina patengahan bulan Séptémber 2017, sarta réngsé dina ahir bulan Nopémber 2017. Lian ti éta, ogé dina prosés ngagawéan pangwangunannana, dilaksanakeun ku sakumna unsur warga masarakat, ti mimiti BKM (Badan Keswadayaan Masyarakat) Jukung Sawala, nepi ka para santri jeung pamuda. Sedengkeun dina taun saméméhna, di Kalurahan Warudoyong geus diwangun jalan lingkungan sapanjang kurang leuwih 2.000 méter, anu ngawengku Gang Warudoyong 1, Gang Masjid, Gang Murni, Gang Cipoho jeung Gang Dwikora. Disagigireun ti éta, ogé geus diwangun  3 séptic tank komunal, sarta 2 sarana cai bersih jeung 1 MCK.

Kapala DPU-PRP-KPP Kota Sukabumi ngajéntrékeun, maksud jeung tujuan dilaksanakeunnana program Kotaku di Kota Sukabumi téh, diantarana pikeun ngaronjatkeun aksés infrastruktur jeung palayanan dasar di wewengkon padet padumuk, sarta pikeun ngarojong ngawujudna pamukiman pakotaan anu pantes, bersih, éndah jeung séhat, sarta genah dicicingan.