SUKABUMI SUMMIT TAUN 2016 BISA NGAHANGKEUTKEUN PANGWANGUNAN JALAN TOL BOCIMI

Reporter : ENDANG SUMARDI

Sukabumi Summit Taun 2016 anu diluluguan ku Walikota Sukabumi, H. Mohamad Muraz, S.H., M.M., sarta diiluan ku 10 Pamaréntah Kota jeung Kabupatén sa Jawa Barat, anu ngawengku Pamaréntah Kota Sukabumi, Kota Bandung, Kota Cimahi, Kota Bogor jeung Kota Dépok, katut Kabupatén Sukabumi, Kabupatén Cianjur, Kabupatén Bandung, Kabupatén Bandung Barat jeung Kabupatén Bogor, bisa ngahangkeutkeun pangwangunan Jalan Tol Bocimi (Bogor-Ciawi-Sukabumi) nyambung nepi ka Bandung.

Walikota Sukabumi, H. Mohamad Muraz, S.H., M.M. nandeskeun, usaha ngahangkeutkeun pangwangunan Jalan Tol Bocimi pikeun wewengkon jalur tengah Propinsi Jawa Barat hususna Kota Sukabumi ngaliwatan Sukabumi Summit téh, geus ka gambar jeung gedé harepan bisa diwujudkeun. Buktina Bapa Persidén, Ir. H. Joko Widodo, geus ngawujudkeun pangwangunan éta jalan tol, sarta ditargétkan kudu réngsé nepi ka Kota Sukabumi dina taun 2019 nu bakal datang.

Salian ti éta, Bapa Persidén ogé ngawujudkeun pangwangunan double track atawa jalur ganda Karéta Api Bogor-Sukabumi, kalayan ditargétkeun kudu réngsé dina taun 2019 nu bakal datang, sarta baris ngawujudkeun pangwangunan Bandara Sukabumi. Ngan pikeun tempatna, nepi ka danget ieu téh masih kénéh dirasiahkeun. Anu jelas, pangwangunan éta Bandara téh ditargétkeun kudu réngsé dina taun 2020 nu bakal datang.

Salajuna dijelaskeun, husus pikeun Jalan Tol Bocimi tahap munggaran, nurutkeun béwara pamungkas ti Bapa Persidén, dina bulan Maret 2018 ieu geus bisa digunakeun. Sedengkeun pikeun nepi ka Kota Sukabumi, dina danget ieu masih dina tahap prosés pangbébasan lahan. Tah kulantaran kitu, Walikota Sukabumi ngaharepkeun, sangkan prosés pangbébasan éta lahan téh hususna di Kota Sukabumi bisa réngsé dina taun 2018 ieu, malah mandar pangwangunan Jalan Tol Bocimi téh bisa réngsé nepi ka Kota Sukabumi dina taun 2019 nu bakal datang.

Nyigeung Sukabumi Summit naha bisa henteuna diterapkeun dina program pangwangunan séjénnna, numutkeun Walikota Sukabumi bisa waé, asal pikeun kapentingan sababaraha Kapala Daérah di wewengkon jalur tengah Propinsi Jawa Barat, anu ngawengku Kota Sukabumi, Kota Bandung, Kota Cimahi, Kota Bogor jeung Kota Dépok, katut Kabupatén Sukabumi, Kabupatén Cianjur, Kabupatén Bandung, Kabupatén Bandung Barat jeung Kabupatén Bogor. Buktina ngaliwatan Sukabumi Summit téh, hasil ngadorong Pamaréntah Puseur, pikeun ngahangkeutkeun pangwangunan Jalan Tol Bocimi.

Lian ti éta ogé dijelaskeun, Sukabumi Summit téh ngarupakeun sala sahiji usaha jeung tarékah saperti démo ti Pamaréntah Daérah. Ngan leuwih élegant, sabab démona langsung dilaksanakeun ku nu nyarekel jeung panangtu kawijakan di daérah, sarta Pamaréntah Puseur baris leuwih merhatikeun jeung baris sagancangna ngawujudkeunnana. Sala sahiji buktina, nya éta ngahangkeutkeun pangwangunan Jalan Tol Bocimi, sabagé cikal bakal tina Sukabumi Summit.