Warga Masarakat Anu Hayang Nyalurkeun Hak Pilih Dina Pilkada Taun 2018 Kudu Ngabogaan É-Ktp

Reporter : ENDANG SUMARDI

Warga masarakat Kota Sukabumi anu hayang nyalurkeun aspirasi jeung hak pilih dina Pilkada (Pamilihan Kapala Daérah) Taun 2018 nu bakal datang, kudu ngabogaan é-KTP atawa Kartuh Tanda Padumuk éléktronik. Tah kulantaran kitu, KPU (Komisi Pamilihan Umum) Puseur nepi ka Kabupatén jeung Kota, geus ngalaksanakeun MoU (Mémorandum of Understanding) atawa Nota Kasaluyuan Gawé Bareng, jeung Ditjén Dukcapil (Diréktorat Jéndral Kependudukan jeung Pencatatan Sipil) Kemendagri (Kementrian Dalam Negri) RI, nepi ka Disdukcapil (Dinas Kependudukan jeung Pencatatan Sipil) Kabupatén jeung Kota.

Sakumaha anu dijelaskeun ku Kapala Disdukcapil Kota Sukabumi, Iskandar, S.IP., M.T., éta MoU téh aya kaitanana jeung usaha ngaronjatkeun data kapadumukan pikeun Pilkada. Tah kuayana éta hal téh, dina ngalaksanakeun validitasi data padumuk, hususna anu geus ngabogaan hak pilih di satiap daérah kaasup di Kota Sukabumi, baris dilaksanakeun babarengan, nya éta ku KPU jeung Disdukcapil. Saterusna dijelaskeun, é-KTP téh penting pisan jeung kudu dipibanda ku satiap warga masarakat wajib é-KTP, boh keur kapentingan Pilkada boh keur kapentingan séjénna. Tah kukituna, Disdukcapil Kota Sukabumi, salawasna usaha satékah polah sakaligus ngaronjatkeun satiap warga masarakat Kota Sukabumi wajib é-KTP, pikeun mibanda é-KTP, diantarana ku jalan ngalaksanakeun program unggulan Disdukcapil Kota Sukabumi, nya éta program Jempol (Jemput Bola) palayanan é-KTP.

Sedengkeun Anggota Komisionér KPU Kota Sukabumi, Harlan Awaludin ngajelaskeun, kawajiban warga masarakat anu hayang nyalurkeun aspirasi jeung hak pilih dina Pilkada kudu ngabogaan é-KTP téh, luyu jeung amanat Undang-Undang Nomer 10 Taun 2016, ngeunaan Pamilihan Gubernur, Bupati jeung Walikota, nya éta é-KTP téh ngarupakeun sala sahiji sarat pikeun nyalurkeun aspirasi jeung hak pilih warga masarakat, boh pikeun pamilih munggaran boh pikeun pamilih heubeul.

Tah kulantaran kitu, pihak KPU Kota Sukabumi jeung Disdukcapil Kota Sukabumi, salawasna usaha satékah polah ngalaksanakeun panyuluhan jeung sosialisasi ka sakumna lapisan warga masarakat Kota Sukabumi wajib é-KTP, sangkan sagancangna ngurus jeung ngarékam data é-KTP, ka Disdukcapil Kota Sukabumi, saupama hayang nyalurkeun aspirasi jeung hak pilih dina Pilkada Taun 2018 nu bakal datang. Lantaran saupama geus ngarékam data é-KTP mah, sok sanajan balangko é-KTP-na can aya, baris dibéré Surat Katerangan ku Disdukcapil Kota Sukabumi, sarta ngabogaan hak pikeun nyalurkeun aspirasi jeung hak pilih dina Pilkada Taun 2018 nu bakal datang.

Salian ti éta, pihak KPU Kota Sukabumi ogé terus-terusan ngalaksanakeun koordinasi jeung pihak Disdukcapil Kota Sukabumi, pikeun mastikeun warga masarakat Kota Sukabumi anu geus ngabogaan hak pilih, hususna anu geus ngarékam data é-KTP. Salajuna dijelaskeun, DPT (Daftar Pamilih Tetep) di Kota Sukabumi, bisa nambahan atawa ngurangan tina DPT taun saméméhna. Sabab masih kénéh réa warga masarakat Kota Sukabumi anu geus ngabogaan hak pilih, can ngarékam data é-KTP ka Disdukcapil Kota Sukabumi.