DINA TAUN 2017 WEWENGKON PADET PADUMUK DI KOTA SUKABUMI NGURANGAN 35 HÉKTAR

Reporter : ENDANG SUMARDI

Dina taun 2017, wewengkon padet padumuk di Kota Sukabumi ngurangan salega 35 héktar, tina sagemblengna salega 139,02 héktar. Nguranganna éta wewengkon téh, nya éta ku ayana program Kotaku (Kota Tanpa Kumuh) Taun 2017. Sedengkeun sésana salega 104,02 héktar deui, baris diungkulan ngaliwatan program anu sarua dina taun 2018 ieu. Hal éta téh ditepikeun ku Wakil Walikota Sukabumi, H. Achmad Fahmi, S.Ag., M.M.Pd., dina lolongkrang basa ngamonitor program Kotaku di KSM (Kelompok Swadaya Masarakat) Babakan, Kalurahan Nanggeléng, Kacamatan Citamiang, Kota Sukabumi, cindekna tanggal 16 Januari 2018.

Salajuna dijelaskeun, program Kotaku téh ngarupakeun sala sahiji usaha strategis, ti Diréktorat Pangembangan Kawasan Pamukiman Diréktorat Jéndral Cipta Karya Kamentrian Pekerjaan Umum jeung Paimahan Rahayat RI, anu dilaksanakeun di daérah kaasup di Kota Sukabumi. Anapon sasaran jeung kagiatan pangwangunan anu dilaksanakeun ngaliwatan éta program téh, diantarana pangwangunan jalan lingkungan, nyieun séptic tank komunal, pangwangunan drainaseu jeung pangwangunan sarana cai bersih.

Lian ti éta ogé dijelaskeun, program Kotaku téh ngawengku NSUP (National Slum Upgrading Program) jeung NUSP-2 (Neighborhood Upgrading and Shelter Project Phase 2). Anapon program NSUP taun 2017, di Kota Sukabumi ngahontal 15 kalurahan, nya éta Kalurahan Karang Tengah, Gunung Puyuh, Karamat, Cikolé, Kebonjati jeung Kalurahan Selabatu, sarta Kelurahan Citamiang, Nanggeléng, Sudajaya Hilir, Cibeureum Hilir, Jayaraksa, Jayamekar, Baros, Nyomplong jeung Kalurahan Bénténg. Sedengkeun program NUSP-2 ngahontal 12 kelurahan, anu ngawengku Kalurahan Sukakarya, Gedong Panjang, Cipanengah, Tipar jeung Kalurahan Cikondang, sarta Kalurahan Situmekar, Warudoyong, Sriwidari, Cisarua, Sindang Palay, Limus Nunggal jeung Kalurahan Subangjaya.

Leuwih jauh Wakil Walikota ngajelaskeun, dilaksanakeunana program Kotaku téh, tujuanana nya éta pikeun ngaronjatkeun aksés infrastruktur jeung palayanan dasar di wewengkon padet padumuk pakotaan, sarta pikeun ngarojong ngawujudna pamukiman pakotaan anu layak dicicingan, sarta produktip jeung tuluy tumuluy. Saterusna dijelaskeun, dina ngalaksanakeun éta program téh ngalibetkeun sakumna unsur warga masarakat, ti mimiti BKM (Badan Kaswadayaan Masarakat) nepi ka para santri jeung pamuda. Wakil Walikota Sukabumi ngaharepkeun ka sakumna lapisan warga masarakat Kota Sukabumi, sangkan hasil-hasil pangwangunan anu dilaksanakeun ngaliwatan program Kotaku téh, supaya salawasna dijaga jeung dipiara sacara hadé, malar kaayaanana bisa dimangpaatkeun ku sakumna lapisan warga masarakat dina jangka waktu anu lila.