ATLÉT SKATEBOARDING KOTA SUKABUMI HASIL NEMBUS KANCAH INTERNASIONAL

Reporter : ENDANG SUMARDI

Wakil Wali Kota Sukabumi, H. Achmad Fahmi, S.Ag., M.M.Pd., narima sakaligus ngalaksanakeun audiénsi jeung sala saurang atlét Skateboarding Kota Sukabumi, Wanda Séptiadi Saputra, anu hasil nyeungitkeun ngaran Kota Sukabumi jeung Indonésia, lantaran hasil nembus kancah internasional, nya éta di Asian Games 2018. Ěta acara téh lumangsung di Rumah Dines Wakil Walkota Sukabumi, cindekna tanggal 6 Pébruari 2018.

Dina kasempetan éta Wakil Wali Kota Sukabumi ngungkabkeun, sanggeus Wanda Septiadi Saputra dibéwarakeun asup Final 10 Besar PROJAM Fést International Open 2018 di Bali, sarta hasil asup Seléksi Nasional Asian Games 2018, kacida ngagumbirakeun jeung ngareueuskeun sarta nyugemakeun sakumna pihak, boh pamaréntah boh warga masarakat Kota Sukabumi. Lantaran Wanda Septiadi Saputra, ngabogaan hak ngawakilan Indonésia dina évent akbar sa Asia, anu baris lumangsung di Jakarta jeung Palémbang dina patengahan taun 2018 ieu.

Salajuna dijelaskeun, pamuda anu ngagabung dina MST (Merdéka Skateboarding Téam Sukabumi) ieu téh, hasil asup kana Tim Skateboarding Indonésia, sarta dijerona ngawengku para atlét Skateboarding anu geus moyan di Indonésia, saperti Pévi Permana jeung Géa ti Bandung, Mario Palandeng jeung Sanggoé ti Bali, katut nu séjénna.

Sedengkeun Wanda Séptiadi Saputra ngajelaskeun, Seléksi Skateboarding Nasional Asian Games 2018, geus dilaksanakeun dina awal bulan Pébruari 2018, sarta diiluan ku 50 atlét Skateboarding sa Indonésia, kalayan anu dinyatakeun asup kana Tim Skateboarding Indonésia kana Asian Games 2018 ngan ukur 10 urang.

Lian ti éta ogé dijelaskeun, Tim Skateboarding Indonésia, nurutkeun rarancang baris ngalaksanakeun pamuseuran latihan di Woodward Camp Amerika Serikat, dina waktu deukeut. Sateruna Wanda Séptiadi Saputra neda doa ka sakuna aparat pamaréntah jeung warga masarakat sarta atlét Skateboarding Kota Sukabumi, hususna ka Wali Kota katut Wakil Wali Kota Sukabumi sarta instansi jeung lembaga nu aya kaitannana, sangkan Tim Skateboard Indonésia ngabogaan prestasi anu hadé, sarta bisa nyeungitkeun ngaran Indonésia dina évent akbar sa Asia.