WALI KOTA SUKABUMI NGARESMIKEUN LAUNCHING INDONÉSIA CITY ĚXPO 2018 DI KOTA TARAKAN

Reporter : ENDANG SUMARDI

Wali Kota Sukabumi, H. Mohamad Muraz, S.H., M.M., salaku Wakil Ketua Widang Informasi, Advokasi jeung Hukum APEKSI (Asosiasi Pemerintah Kota Seluruh Indonésia), dina tanggal 6 Pébruari 2018, di Balroom Hotél Tarakan Plaza Kota Tarakan Propinsi Kalimantan Utara, ngaresmikeun Launching ICĚ (Indonésia City Ěxpo) atawa Pekan Promosi Kota-Kota di Indonésia, sarta Rakernas (Rapat Kerja Nasional) APEKSI  Taun 2018, anu ditangaraan ku Nakol Goong. Anapon éta kagiatan téh, baris lumangsung salila 5 poé, cindekna ti tanggal 25 nepi ka tanggal 29 Juli 2018 nu bakal datang, sarta baris diiluan ku 98 Wali Kota sa Indonésia.

Sedengkeun kagiatan Launching ICĚ Taun 2018, dihadiran ku 8 Wali Kota katut Wakil Wali Kota sa Indonésia, anu ngawengku Wali Kota Tangerang Selatan, Airin Rachmi Diany, S.H., M.H., M.Kn., salaku Ketua APEKSI, Wali Kota Palu katut garwana, Wali Kota katut Wakil Wali Kota Pangkal Pinang, Wali Kota katut Wakil Wali Kota Prabumulih, Wakil Wali Kota Taksimalaya, Wakil Wali Kota Tanjung Baléy katut garwana, Wali Kota Solok katut garwana, sarta para Sekertaris Daérah, para Asistén Daérah, para Kapala Bagian Paékonomian, Pangwangunan jeung Kerjasama Daérah.

Wali Kota Sukabumi, H. Mohamad Muraz, S.H., M.M. ngajelaskeun, dina Rakernas APEKSI Taun 2018, baris dibahas rupa-rupa masalah jeung pasualan anu di sang hareupan ku sakumna Pamaréntah Kota sa Indonésia, sakaligus ditéangan jalan kaluarna anu hadé, pikeun ngungkulan jeung ngaréngsékeunnana. Saterusna dina kagiatan ICĚ Taun 2018, baris dipintonkeun rupa-rupa poténsi anu dipibanda ku masing-masing Pamaréntah Kota sa Indonésia, sarta teu nutup kamungkinan baris lumangsung transaksi ékonomi. Salian ti éta, oge baris dilaksanakeun Pawéy Budaya, Pananeman Tangkal Kai, Ladies Programme, Pagelaran Seni Budaya, Post Tour, City Tour jeung Pangajénan Stand Pang Hadéna.

Salajuna Wali Kota Tarakan, Sofian Raga, cumeluk ka sakumna lapisan warga masarakat Kota Tarakan, sangkan nyiapkeun diri jeung ilubiung sacara aktif babarengan jeung Pamaréntah Kota Tarakan, pikeun mintonkeun sakumna produk nu aya di Kota Tarakan dina kagiatan ICĚ Taun 2018. Lantaran éta kagiatan téh ulah nepi ka dilalaworakeun, tapi kudu dijadikeun kasempetan, pikeun mintonkeun sakumna produk unggulan, supaya bisa dipikawanoh jeung dibeuli ku para tamu jeung warga masarakat Kota Tarakan. Wali Kota Tarakan ngajelaskeun, dina kagiatan ICĚ Taun 2018 téh, lain ngan saukur diiluan ku Pamaréntah Kota sa Indonésia wungkul, tapi ogé diiluan ku para palaku usaha sa Indonésia. Tah kulantaran kitu, Kota Tarakan téh baris jadi tempat transaksi padagangan, salila kagiatan ICĚ Taun 2018 lumangsung.