POLDA JABAR BARIS NINDAK TEGAS SATIAP PALANGGARAN DINA PILKADA BARENG TAUN 2018 DI KOTA SUKABUMI

Reporter : ENDANG SUMARDI

Kapolda Jabar, Irjén Pol. Drs. Agung Budi Maryoto, M.Si. nandeskeun, Polda Jabar baris nindak tegas satiap palanggaran dina Pilkada (Pamilihan Kapala Daérah) Bareng Taun 2018 di Kota Sukabumi, nya éta Pilkada Gubernur katut Wakil Gubernur Jawa Barat sarta Pilkada Walikota katut Wakil Walikota Sukabumi Periodeu Taun 2018-2023, gawe bareng jeung KPU (Komisi Pamilihan Umum) katut Bawaslu (Badan Pangawas Pamilu), diantarana ku cara nartibkeun jeung ngabubarkeun atawa tindak pidana Pilkada.

Ěta panandesan Kapolda Jabar téh, ditepikeun basa jadi Inspéktur Upacara dina Apél Bareng jeung Gebyar Déklarasi Daméy sarta Ngabentuk Satgas (Satuan Tugas) Tripatra jeung Simulasi Pangamanan Pilkada Bareng Taun 2018 di Kota Sukabumi, cindekna tanggal 2 Pébruari 2018, di Lapangan Merdeka Kota Sukabumi. Anapun Satgas Tripatra Pilkada Bareng Taun 2018 di Kota Sukabumi téh, ngawengku ti Sabhara (Samapta Bhayangkara). Brimob (Brigade Mobil) jeung TNI (Tentara Nasional Indonésia).

Hadir dina kasempetan éta, Wali Kota Sukabumi, H. Mohamad Muraz, S.H., M.M., Unsur FKPD (Forum Komunikasi Pingpinan Daérah) Kota Sukabumi, Dan Yonif 310 Kidang Kancana, Dan Yon Arméd 13 Nanggala Kostrad, para Kapala OPD (Organisasi Parangkat Daérah) sarta instansi jeung lembaga nu aya kaitannana, para Bapaslon (Bakal Pasangan Calon) Walikota katut Wakil Walikota Sukabumi anu baris jadi pamilon Pilkada Kota Sukabumi Taun 2018, sarta para tamu ondangan liana.

Salajuna ditandeskeun, dilaksanakeunnana Apél Bareng jeung Gebyar Déklarasi Daméy sarta Ngabentuk Satgas Tripatra jeung Simulasi Pangamanan Pilkada Bareng Taun 2018 di Kota Sukabumi téh, nya éta pikeun mariksa kasiapan personil jeung kalengkepan Polri katut TNI sarta instansi jeung lembaga nu aya kaitananana. Anapon maksud jeung tujuannana, sangkan palaksanaan Pilkada Bareng Taun 2018 hususna di Kota Sukabumi umumna di Jawa Barat, bisa lumangsung aman jeung daméy sarta kondusif jeung optimal.

Salian ti éta ogé ditandeskeun, waktu Pilkada ngan ukur tinggal 145 poé deui, nya éta baris dilaksanakeun dina tanggal 27 Juni 2018 nu bakal datang, jeung waktu palaksanaan tahapan kampanyeu ngan ukur tinggal sababara poé deui, nya éta baris dilaksanakeun dina patengahan bulan Pébruari 2018 nepi ka patengahan bulan Juni 2018 nu bakal datang.

Tah kulantaran kitu, Kapolda Jabar ngingetan, sangkan dina waktu palaksanaan kampanyeu teu meunang masualkeun Pancasila jeung Undang-Undang Dasar 1945, kaasup Ras, Suku jeung Golongan, sarta teu meunang ngalampahkeun rupa-rupa hal anu dilarang dina aturan jeung undang-undang anu ditetepkeun. Disagigireun ti éta ogé teu meunang ngasut jeung mitnah, sarta teu meunang ngadu domba jeung ngagunakeun tempat ibadah sabagé tempat kampanyeu.