TIMSÉS PASLON WALI KOTA KATUT WAKIL WALI KOTA SUKABUMI SANGKAN NGAJAGA KONDUSIFITAS KOTA SUKABUMI

Reporter : ENDANG SUMARDI

Kapolres Sukabumi Kota, AKBP Susatyo Purnomo Condro, S.H., S.I.K., M.Si., cumeluk ka sakumna Timsés (Tim Suksés) kaasup rélawan jeung simpatisan Paslon (Pasangan Calon) Wali Kota katut Wakil Wali Kota Sukabumi anu miluan Pilkada (Pamilihan Kapala Daérah) Kota Sukabumi Tahun 2018, sangkan salawasna usaha satékah polah ngajaga kondusifitas wewengkon Kota Sukabumi. Tah kulantaran kitu, sakumna Timsés kaasup rélawan jeung simpatisan Paslon Wali Kota katut Wakil Wali Kota Sukabumi, sangkan teu ngalaksanakeun tingkah polah anu bisa nimbulkeun kana aksi kriminalitas, panyebaran isu sara jeung hoax atawa nyebarkeun béwara anu teu bener.

Kapolres Sukabumi Kota nandeskeun, saupama aya Timsés kaasup rélawan jeung simpatisan Paslon Wali Kota katut Wakil Wali Kota Sukabumi anu ngareumpak kana éta aturan baris ditindak tegas, luyu jeung katangtuan aturan katut undang-undang anu ditetepkeun. Salajuna ditandeskeun, palanggaran tindak pidana salila lumangsung Pilkada Wali Kota katut Wakil Wali Kota Sukabumi jeung palanggaran Pilkada Wali Kota katut Wakil Wali Kota Sukabumi baris dipisah. Lantaran pikeun palanggaran Pilkada Wali Kota katut Wakil Wali Kota Sukabumi baris dilaksanakeun ku Panwaslu (Panitia Pangawas Pamilu) Kota Sukabumi leuwih ti heula. Sabab mékanismeu dina nanjeurkeun hukum palanggaran Pilkada téh, kudu nungguan heula laporan ti Panwaslu.

Leuwih jauh Kapolres Sukabumi Kota nandeskeun, pikeun ngarojong kalancaran jeung kaamanan sarta katartiban, kaayeman jeung katengtreman dina palaksanaan Pilkada Walikota katut Wakil Walikota Sukabumi Taun 2018, aparat Polres Sukabumi Kota baris salawasna usaha satékah polah nalingakeun jeung ngamankeun palaksanaan éta Pilkada, gawé bareng jeung aparat ti Sub Den Pom Sukabumi, Kodim 0607 Kota Sukabumi, Satpol PP Kota Sukabumi jeung nu séjénna.

Lian ti éta, Kapolres Sukabumi Kota ngaharepkeun ka sakumna Timsés kaasup rélawan jeung simpatisan Paslon Wali Kota katut Wakil Wali Kota Sukabumi sarta ka sakumna lapisan warga masarakat Kota Sukabumi, sangkan salawasna usaha satékah polah sakaligus ngalaksanakeun gawé bareng jeung sakumna aparat kaamanan, hususna dina ngajaga sakaligus ngaronjatkeun kaayaan kondusif wewengkon Kota Sukabumi, pikeun nyiptakeun kaayaan Pilkada Kota Sukabumi anu aman, tartib, ayem, tengtrem jeung rukun. Sabab éta hal téh kacida pisan pentingna dilaksanakeun ku sakumna pihak, pikeun ngajamin sakaligus ngarojong kalancaran jeung kaamanan warga masarakat, dina ngalaksanakeun rupa-rupa kagiatan jeung kahirupan sapopoé.