SAKUMNA PASLON WALI KOTA KATUT WAKIL WALI KOTA SUKABUMI SIAP MEUNANG JEUNG SIAP ÉLÉH

Reporter : ENDANG SUMARDI

Sakumna Paslon (Pasangan Calon) Wali Kota katut Wakil Wali Kota Sukabumi anu milu Pilkada (Pamilihan Kapala Daérah) Kota Sukabumi Taun 2018, anu ngawengku Nomor Urut 1 Paslon Ijabah (Insya Alloh Jona Arizona katut Hanafie Zain Barokah), Nomor Urut 2 Paslon Faham (Achmad Fahmi katut Andri Setiawan Hamami), Nomor Urut 3 Paslon Mulia (Mulyono katut Ima Slamet), sarta Nomor Urut 4 Paslon Dermawan (Dédi R. Wilaya katut Hikmat Nuristawan), sacara babarengan maca jeung nandatangan Déklarasi Répéh-Rapih Pilkada Kota Sukabumi Taun 2018, cindekna dina Déklarasi Kampanyeu Répéh-Rapih anu lumangsung tanggal 18 Pébruari 2018, di Jalan Lingkar Selatan Kota Sukabumi.

Anapon éta Déklarasi Répéh-Rapih Pilkada Kota Sukabumi téh, diantarana siap meunang jeung siap éléh, sarta siap narima hasil Pilkada Kota Sukabumi Taun 2018, boh kapilih boh teu kapilih kalayan pinuh ku kaihlasan, luyu jeung aturan katut undang-undang anu ditetepkeun. Salian ti éta, ogé siap ngalaksanakeun prosés kampanyeu sacara Luber (Langsung, Umum, Bébas jeung Rahasiah) sarta Jurdil (Jujur jeung Adil), luyu jeung aturan katut undang-undang anu ditetepkeun, katut motto Maslahat (Mandiri, Akuntabel, Suksés jeung Hasil Akurat sarta Terpercaya).

Salajuna ogé siap gawé bareng jeung KPU (Komisi Pamilihan Umum) jeung Panwaslu (Panitia Pangawas Pamilu) sarta Kapulisian, TNI jeung Aparat Kaamanan lianna, pikeun ngajaga situasi jeung kondisi Kota Sukabumi anu aman jeung répéh-rapih. Saterusna siap jeung sanggup ngadalikeun Tim Kampanyeu jeung massa anu ngarojong, luyu jeung sumanget masarakat anu reugreug pageuh répéh rapih loh jinawi, silih asah, silih asih jeung silih asuh, sarta moal ngalaksanakeun kampanyeu ku béwara hoax, SARA (Suku, Agama, Ras jeung Antar Golongan), kaasup omongan kaceuceub jeung pulitik uang.

Ketua KPU Kota Sukabumi, Hamzah, S.Ag. ngaharepkeun, ku dilaksanakeunnana maca jeung nandatangan Déklarasi Répéh-Rapih Pilkada Kota Sukabumi Taun 2018 ku 4 Paslon Wali Kota katut Wakil Wali Kota Sukabumi téh, palaksanaan Pilkada Kota Sukabumi Taun 2018, bisa lumangsung sacara hadé jeung lancar, sarta aman, tartib, ayem jeung répéh-rapih. Disagigireun ti éta, ogé diharepkeun bisa jadi titik tolak kana palaksaan kampanyeu anu tartib sarta taat kana aturan jeung asas, anu pamustungannana taya kajadian kampanyeu hideung jeung pitnah.

Nyigeung tahapan jeung palaksanaan kampanyeu pikeun ka 4 Paslon Wali Kota katut Wakil Wali Kota Sukabumi Taun 2018, nurutkeun Ketua KPU Kota Sukabumi dibéré waktu salila 129 poé, cindekna ti tanggal 15 Pébruari 2018 nepi ka tanggal 23 Juni 2018 nu bakal datang. Anapon métodeu kampanyeuna, ngawengku rapat umum, rapat nembrak jeung rapat diwates, pikeun ngalaksanakeun sosialisasi ka warga masarakat, kecuali rapat umum. Sedengkeun ngeunaan téhnisna, satiap Paslon Wali Kota katut Wakil Wali Kota Sukabumi anu rék ngalaksanakan kampanyeu, kudu leuwih ti heula méré surat ka kapulisian, boh ngeunaan tempatna boh ngeunaan waktuna.