JADWAL KAMPANYEU RAPAT UMUM PASLON WALI KOTA KATUT WAKIL WALI KOTA SUKABUMI TAUN 2018

Reporter : ENDANG SUMARDI

KPU (Komisi Pamilhan Umum) Kota Sukabumi, geus netepkeun Jadwal Palaksanaan Kampanyeu Rapat Umum Paslon (Pasangan Calon) Wali Kota katut Wakil Wali Kota Sukabumi, anu miluan Pilkada (Pamilihan Kapala Daérah) Kota Sukabumi Taun 2018. Nya éta pikeun Paslon Nomer Urut 2 Faham (Achmad Fahmi katut Andri Setiawan Hamami) tanggal 11 Maret 2018, sarta pikeun Paslon Nomer Urut 3 Mulia (Mulyono katut Ima Slamet) tanggal 25 Maret 2018. Salajuna pikeun Paslon Nomer Urut 1 Ijabah (Insya Alloh Jona Arizona katut Hanafie Zain Barokah) tanggal 15 April 2018, sarta pikeun Paslon Nomer Urut 4 Dermawan (Dédi R. Wilaya katut Hikmat Nuristawan) tanggal 29 April 2018. Anapon tempat Palaksanaan Kampanyeu Rapat Umum Paslon Wali Kota katut Wakil Wali Kota Sukabumi éta téh, geus ditetepkeun di Lapangan Sukakarya, Kalurahan Sukakarya, Kacamatan Warudoyong, Kota Sukabumi.

Komisioner KPU Kota Sukabumi, Dra. Sri Utami, M.M. ngajelaskeun, Jadwal Palaksanaan Kampanyeu Rapat Umum Paslon Wali Kota katut Wakil Wali Kota Sukabumi éta téh ditangtukeun ku cara dikonclong, sarta disaksian ku sakumna LO Paslon Wali Kota katut Wakil Wali Kota Sukabumi, kaasup Panwaslu (Panitia Pangawas Pamilu) Kota Sukabumi. Disagigireun ti éta, KPU Kota Sukabumi ogé geus netepkeun Jadwal Debat Paslon Wali Kota katut Wakil Wali Kota Sukabumi anu réana 3 kali, nya éta dina tanggal 7 April 2018, tanggal 12 Méi 2018, jeung tanggal 20 Juni 2018. Sedengkeun ngeunaan tempat pikeun palaksanaannana can ditangtukeun.

Salajuna dijelaskeun, KPU Kota Sukabumi geus masrahkeun prosés pamasangan APK (Alat Paraga Kampanyeu) ka satiap Timsés (Tim Suksés) Paslon Wali Kota katut Wakil Wali Kota Sukabumi, pikeun dipasang sorangan di tempat anu geus ditangtukeun ku KPU Kota Sukabumi, boh sacara ngaréndéng antara Paslon Wali Kota katut Wakil Wali Kota Sukabumi boh sacara misah. Anapon éta APK téh ngawengku 5 Baliho, 20 Umbul-Umbul jeung 2 Spanduk, sarta 30 ribu Poster Flyer jeung Pamflét pikeun bahan kampanyeu. Leuwih jauh dijelaskeun, éta APK téh dipasrahkeun ka satiap Timsés Paslon Wali Kota katut Wakil Wali Kota Sukabumi sacara nungtut, nya éta 3 kali, luyu jeung hasil mupakat babarengan.