DISKOMINFO KOTA SUKABUMI GEUS NYALAGARAKEUN FGD TAUN 2018

Reporter : ENDANG SUMARDI

Diskominfo (Dines Komunikasi jeung Informatika) Kota Sukabumi, geus nyalagarakeun FGD (Focus Group Discussion) Taun 2018, dina wanda dialog interaktif akselerasi pamangpaatan téknologi informasi jeung komunikasi, dina raraga pamarataan pangwangunan di Kota Sukabumi, cindekna tanggal 1 Maret 2018, di Hotel Balcony Kota Sukabumi.

Ěta kagiatan anu dibuka sacara resmi ku Kapala Diskominfo Kota Sukabumi, Drs. H. Sukarman, M.Pd. téh, diiluan ku 40 pamilon pawakilan ti SKPD (Satuan Kerja Parangkat Daérah) jeung Kacamatan sa Kota Sukabumi, Humas Polres Sukabumi Kota, Ketua Jurusan Téknik Informatika UMMI (Universitas Sukabumi) jeung Politéknik Sukabumi, Kapala SMK Negri 1, 2 jeung 3 Kota Sukabumi, pawakilan Komunitas Kelompok Informatika Masarakat Kota Sukabumi, jeung pawakilan palaku UMKM (Usaha Mikro Kecil jeung Menengah) Kota Sukabumi.

Sedengkeun nu jadi nara sumber dina éta kagiatan téh, nya éta Kapala Widang Komunikasi jeung Statistik Diskominfo Kota Sukabumi, Tantan Sontani, S.IP., M.Si., Kapala Widang Infrastruktur TIK (Téknologi, Informasi jeung Komunikasi), Pasandian jeung Integrasi Data Diskominfo Kota Sukabumi, H. Yuli Noviawan, S.T., M.T., Kapala Widang Sosial Budaya Bappeda (Badan Parancanaan Pangwangunan Daérah) Kota Sukabumi, Ida Halimah, S.KM., jeung ti Biznét, Ari.

Dina éta kagiatan téh, para pamilon nyaluyuan jeung nanda tangan berita acara 5 point hasil dialog interaktif, anu diwakilan ku Kapala Diskominfo Kota Sukabumi, Drs. H. Sukarman, M.Pd., Ida Halimah, S.K.M., Lulu Yuliasari, S.H., Muhamad Ridwan, M.T., Géri Sugiran AS, ST.P., jeung Hélda, M.Pd.

Anapon ka 5 point hasil dialog interaktif téh, nya éta nyaluyuan program jeung kagiatan prioritas jeung indikator kinerja anu dibarengan ku targét jeung kabutuhan waragad, anu geus disaluyukeun jeung usulan kagiatan prioritas dina Musrenbang (Musawarah Parancanaan Pangwangunan) RKPD (Rancana Kerja Pangwangunan Daérah) Kota di Kacamatan. Salajuna nyaluyuan Rancangan Rancana Kerja SKPD Diskominfo Kota Sukabumi Taun 2018, sarta nyaluyuan daptar usulan program jeung kagiatan lintas SKPD jeung lintas wilayah. Saterusna nyaluyuan kana berita acara éta kagiatan jeung lampirannana, sabagé hiji kasatuan jeung ngarupakeun bagian anu teu bisa dipisahkeun tina berita acara hasil kasaluyuan Forum Parangkat Daérah Diskominfo Kota Sukabumi Taun 2018, sarta éta berita acara jeung lampirannana dijadikan sabagé bahan panyampurnaan Rancangan RKPD Diskominfo Kota Sukabumi Taun 2018.