DKP3 KOTA SUKABUMI NYALAGARAKEUN PANYULUHAN PRODUK PAH HAUS

Reporter : RIKSAN SATYAPRAWIRA

Redaktur : ENDANG SUMARDI

DKP3 (Dines Katahanan Pangan, Patanian jeung Paikanan) Kota Sukabumi, nyalagarakeun panyuluhan produk PAH HAUS (Pangan Asal Héwan anu Halal, Aman, Utuh jeung Séhat), pikeun para palaku usaha produk pangan asal héwan katut SKPD (Satuan Kerja Parangkat Daérah) jeung instansi nu aya kaitannana, cindekna tanggal 19 April 2018, di Gedong Wanita Kota Sukabumi.

Ěta kagiatan anu dibuka sacara resmi ku Asistén Paékonomian jeung Pangwangunan Setda Kota Sukabumi, H. Dédén Solehudin, S.Ag., M.M. téh, dihadiran ku Sekertaris DKP3 Kota Sukabumi, drh. Até Rahmat, M.Si., katut Panata Calagara, Kapala Séksi Kaséhatan Masarakat Vétérinér Widang Paternakan jeung Kaséhatan Héwan DKP3 Kota Sukabumi, drh. Riki Barata. Anapon nu jadi nara sumber dina ieu kagiatan téh, nya éta ti Dines Katahanan Pangan jeung Paternakan Propinsi Jawa Barat, drh. Aryani Widyawati jeung drh. Nani Héndrayani.

Dina biantarana Asistén Paékonomian jeung Pangwangunan Setda Kota Sukabumi ngajelaskeun, yén parobahan paradigma dina pola konsumsi danget ieu téh, nya éta mentingkeun kualitas kadaharan ti batan kuantitas. Hal éta téh timbul tina kasadaran jeung wawasan masarakat pikeun ngahontal hirup séhat, anu pamustungannana baris milih produk pangan asal héwan anu ngabogaan kualitas.

Salajuna dijelaskeun, panyuluhan PAH HAUS ieu téh ngarupakeun kagiatan rutin anu dicalagarakeun ku DKP3 Kota Sukabumi. Maksud jeung tujuannana, nya éta pikeun nyegah panyakit zoonosis atawa inpéksi nu bisa ditularkeun ku héwan vértebrata ka jalma atawa sabalikna saperti anthrax jeung rabies.

Asistén Paékonomian jeung Pangwangunan Setda Kota Sukabumi ngaharepkeun, ku ngaliwatan ieu panyuluhan téh, para palaku usaha bisa ngaronjatkeun pangaweruh jeung wawasan, supaya salawasna bisa méré produk anu ngabogaan kualitas ka para konsuménna.

Sedengkeun nara sumber, drh. Aryani Widyawati jeung drh. Nani Héndrayani, ngajelaskeun ngeunaan pangolahan pangan asal héwan anu halal, nya éta luyu jeung saréat agama, aman nya éta teu ngandung bahaya baktéri jeung kimiawi atawa bahan nu bisa ngaganggu kaséhatan jalma, utuh teu dikurangan atawa dicampuran bahan séjén, jeung séhat nya éta pangan nu bisa nyéhatkeun jalma.

Saterusna dijelaskeun ngeunaan ciri-ciri produk pangan nu ngabogaan kualitas jeung nu teu kaasup kana rupa-rupa ancaman panyakit nu bisa kajadian saupama pangolahan teu dilaksanakeun sacara bener, sarta pola kabersihan anu kudu diterapkeun ku para palaku usaha sanggeus ngolah produk pangan asal héwan.