GUBERNUR JAWA BARAT GEUS NGISTRÉNAN JEUNG NYUMPAH PANJABAT WALI KOTA SUKABUMI

Reporter / Redaktur : ENDANG SUMARDI

Gubernur Jawa Barat, Dr. H. Ahmad Héryawan, Lc., M.Si., sacara resmi geus ngistrénan jeung nyumpah Kapala Biro Yanbangsos (Palayanan jeung Pangembangan Sosial) Setda (Sekertariat Daérah) Propinsi Jawa Barat, Drs. H. Dady Iskandar, M.M., sabagé Panjabat Wali Kota Sukabumi, cindekna tanggal 13 Mei 2018, di Gedong Saté Bandung, luyu jeung Kaputusan Mendagri (Mentri Dalem Negri) RI. Ěta pangistrénan jeung panyumpahan Panjabat Wali Kota Sukabumi téh, dihadiran ku Wali Kota Sukabumi, H. Mohamad Muraz, S.H., M.M., para pajabat di lingkungan Pamaréntah Propinsi Jawa Barat jeung para pajabat di lingkungan Pamaréntah Kota Sukabumi, sarta Pingpinan katut Anggota DPRD Kota Sukabumi, KPU (Komisi Pamilihan Umum) Kota Sukabumi jeung Panwaslu (Panitia Pangawas Pamilu) Kota Sukabumi, sarta para tamu ondangan séjénna.

Dina biantarana Gubernur Jawa Barat ngajelaskeun, dilaksanakeunnana pangistrénan jeung panyumpahan Kapala Biro Yanbangsos Setda Propinsi Jawa Barat sabagé Panjabat Wali Kota Sukabumi téh, nya éta pikeun ngeusi kakosongan jabatan Wali Kota Sukabumi. Lantaran Wali Kota katut Wakil Wali Kota Sukabumi Pariodeu Taun 2013-2018, H. Mohamad Muraz, S.H., M.M. katut H. Achmad Fahmi, S.Ag., M.M.Pd., mangsa jabatannana réngsé dina tanggal 13 Méi 2018. Salian ti éta ogé dijelaskeun. pangistrénan jeung panyumpahan Panjabat Wali Kota Sukabumi téh. luyu jeung pasal 201 ayat 10 Undang-Undang Nomer 10 Taun 2016 ngeunaan Parobahan Kadua Undang-Undang Nomer 1 Taun 2015 ngeunaan Panetepan Paraturan Pamaréntah Pangganti Undang-Undang Nomer 1 Taun 2014 ngeunaan Pamilihan Gubernur, Bupati jeung Wali Kota jadi Undang-Undang ngaamanatkeun, nya éta pikeun ngeusi kakosongan jabatan Bupati atawa Wali Kota, diangkat Panjabat Bupati atawa Wali Kota anu asalna ti Jabatan Pingpinan Luhur Pratama.

Salanjuna Gubernur Jawa Barat meredih ka Panjabat Wali Kota Sukabumi, sangkan bisa ngajamin kalancaran jeung kasuksésan panyalagaraan pamaréntahan di Kota Sukabumi, sarta bisa ngalaksanakeun pancén gawé jeung kawenangan sabagé Panjabat Wali Kota Sukabumi, luyu jeung aturan katut undang-undang anu ditetepkeun. Disagédéngeun ti éta ogé bisa ngawal tahapan Pilkada (Pamilihan Kapala Daérah) Bareng Taun 2018, nya éta Pilkada Gubernur katut Wakil Gubernur Jawa Barat sarta Pilkada Wali Kota katut Wakil Wali Kota Sukabumi. supaya bisa lumangsung kalayan hadé jeung lancar, sarta aman jeung tartib. Lian ti éta ogé dijelaskeun, Panjabat Wali Kota Sukabumi téh, mancén gawé nepi ka aya Wali Kota katut Wakil Wali Kota anu anyar.