PAMARÉNTAH KOTA SUKABUMI ARÉK NYALAGARAKEUN DEUI BURSA KERJA TAUN 2018

Reporter / Redaktur : ENDANG SUMARDI

Pamaréntah Kota Sukabumi ngaliwatan Disnaker (Dines Tanaga Kerja) Kota Sukabumi, arék nyalagarakeun deui Job Fair atawa Bursa Kerja Taun 2018. Sakumaha anu dijelaskeun ku PLT (Palaksana Tugas) Kapala Disnaker Kota Sukabumi, Dra. Hj. Iyan Damayanti, M.Si., éta kagiatan bursa kerja téh dijadwalkeun lumangsung salila 2 poé, nya éta dina tanggal 17 jeung 18 Juli 2018, di Lapangan Merdéka Kota Sukabumi.

Saterusna dijelaskeun, éta kagiatan téh ngarupakeun sala sahiji program taunan Pamaréntah Kota Sukabumi, dina usaha nyiptakeun kasempetan gawé keur warga masarakat, pikeun ngurangan anu ngaligeuh jeung kamiskinan hususna di Kota Sukabumi. Lian ti éta ogé dijelaskeun, éta kagiatan téh nurutkeun rarancang baris diiluan ku 30 pausahaan, boh ti jero boh ti luar wewengkon Kota Sukabumi, nya éta ti sababaraha wewengkon Jawa Barat jeung DKI Jakarta, anu bagerak dina rupa-rupa widang, saperti pahotélan, réstoran jeung nu séjénna, sarta ditargétkeun bisa nempatkeun 3.000 urang. Tah ku lantaran kitu, satiap pausahaan diharepkeun bisa nempatkeun saeutikna 25 urang. Leuwih jauh dijelaskeun, dina kagiatan bursa kerja ieu téh, satiap pausahaan dibéré rohangan pikeun ngalaksanakeun wawancara langsung jeung nu naréangan gawé. Tah ku sabab kitu, nu naréangan gawé téh bisa langsung meunang kapastian ditarima atawa henteuna.

PLT Kapala Disnaker Kota Sukabumi ngajéntrékeun, pikeun ngarojong kalancaran dina ngalaksanakeun bursa kerja ieu téh, geus dilaksanakeun rupa-rupa usaha jeung pasiapan, sarta tinggal nungguan paijinan ti sakumna instansi nu aya kaitannana. Sabab palaksanaan kagiatan ieu bursa kerja téh, dipasrahkeun ka ĚO anu geus ditunjuk sacara resmi ku Disnaker Kota Sukabumi.

Nyigeung jumlah pausahaan anu baris miluan dina ieu kagiatan téh, nurutkeun PLT Kapala Disnaker Kota Sukabumi, anu geus nepikeun paniatannana langsung ka Disnaker Kota Sukabumi, nepi ka danget ieu téh kakara aya 8 pausahaan. Sedengkeun pikeun pausahaan séjénna, dipasrahkeun ka ĚO. Salajuna dijéntrékeun, pikeun taun 2018 ieu, Disnaker Kota Sukabumi nargétkeun panempatan gawé réana 5.000 urang di rupa-rupa pausahaan jeung lapangan gawé. Ěta targét téh gedé harepan bisa dihontal, malah bisa ngaleuwihan targét saperti dina taun-taun saméméhna. Sabagé sala sahiji contona dina taun 2017 nu anyar kaliwat, panempatan anu digawé téh ngaleuwihan target, nya éta ngahontal 5.107 urang, atawa ngahontal 103 peresén tina targét anu ditetepkeun réana 5.000 urang.

Leave a Reply