TANGTANGAN KASÉHATAN DINA DANGET IEU DIANTARANA MASIH LUHURNA PANYAKIT INFÉKSI

Reporter / Redaktur : ENDANG SUMARDI

Wakil Wali Kota Sukabumi, H. Andri Setiawan Hamami, S.H., M.H. nandeskeun, tangtangan kaséhatan dina danget ieu, diantarana masih luhurna panyakit inféksi jeung ngaronjatna panyakit teu nular, sarta munculna deui panyakit anu sakuduna geus kaungkulan jeung luhurna kasus stunting atawa kerdil di Indonésia, sarta hal éta téh jadi sala sahiji ancaman pikeun produktivitas bangsa Indonésia.

Ěta panandesan Wakil Wali Kota Sukabumi téh, ditepikeun dina biantara basa muka sacara resmi Bimték Pangembangan UKBM (Upaya Kaséhatan Bersumberdaya Masarakat) dina Paningkatan Kalurahan Siaga Aktif Strata Mandiri di Kota Sukabumi Taun 2018, anu dilaksanakeun ku Dines Kaséhatan Kota Sukabumi, cindekna tanggal 27 Séptémber 2018 nu geus kaliwat, di Hotél Horison Sukabumi. Hadir dina kasempetan éta, Kapala Dines Kaséhatan Kota Sukabumi, dr. Hj. Ritanénny Ědlien Silyéna Mirah. katut para Kapala OPD (Organisasi Parangkat Daérah) liana, para Camat jeung Lurah, sarta para tamu ondangan lianna.

Anapon usaha pikeun nyingkahan jeung nyegah éta panyakit téh, gumantung kana tingkah laku hirup masarakat masing-masing, anu dirojong ku ajén lingkungan anu hadé sarta bersih jeung séhat, ayana sarana jeung prasarana sarta ayana rojongan regulasi pikeun hirup séhat. Salian ti éta, ogé kacida diperlukeun ayana ilu biung jeung peran aktif ti sakumna komponén, boh pamaréntah boh swasta jeung masarakat.

Salajuna dijelaskeun, pikeun ngadorong jeung ngawujudna éta hal téh, geus diterbitkeun Inprés (Instruksi Persidén) RI Nomer 1 Taun 2017 ngeunaan Germas (Gerakan Masarakat Hirup Séhat), anu dijadikeun panduan ku Pamaréntah Puseur, Pamaréntah Propinsi, Pamaréntah Kabupatén jeung Pamaréntah Kota sarta lintas séktoral nu aya kaitannana, dina ngadorong jeung ngaronjatkeun partisipasi aktif masarakat pikeun salawasna ngalaksanakeun hirup séhat. Disagigireun ti éta, ogé geus diterbitkeun Paraturan Mentri Kaséhatan RI Nomer 39 Taun 2016 ngeunaan PIS-PK (Program Indonésia Séhat dengan Pendekatan Kulawarga), anu muarana kana ngawujudna jeung ngaronjatna darajat kaséhatan masarakat anu saluhur-luhurna, sarta mandiri jeung adil.

Tah ku sabab kitu, Wakil Wali Kota Sukabumi miharep ka sakumna pihak, boh pamaréntah boh swasta jeung masasrakat, sangkan babarengan usaha satékah polah ngawujudkeun sakaligus ngaronjatkeun Germas jeung PIS-PK. Maksud jeung tujuannana, supaya masarakat bisa ngalaksanakeun hirup séhat, anu bisa ngabogaan pangaruh kana kaséhatan jeung leuwih produktif, lingkungan anu leuwih bersih jeung séhat, sarta ngurangannana waragad pikeun tatamba.

Leave a Reply