PMI KOTA SUKABUMI MUKA POSKO 24 JAM

Reporter / Redaktur : ENDANG SUMARDI

Sakumaha anu dijelaskeun ku Ketua PMI (Palang Mérah Indonésia) Kota Sukabumi, drh. H. Suranto Sumowiryo, PMI Kota Sukabumi ti mimiti minggu kamari muka Posko 24 jam, cindekna di hareupeun Markas PMI Kota Sukabumi, Jalan Ariéf Rahman Hakim Kota Sukabumi.  Anapon maksud jeung tujuannana, nya éta pikeun méré P3K (Pertolongan Pertama Pada Kecelakaan) jeung kasiapan Ambulance, pikeun masarakat anu ngarandapan kacilakaan sarta ngabutuhkeun P3K jeung Ambulance di sabudeureun Markas PMI Kota Sukabumi, saméméh diévakuasi ka rumah sakit.

Salajuna dijelaskeun, dina éta kagiatan téh PMI Kota Sukabumi  nurunkeun saurang tanaga médis, dibantu ku tilu urang Rélawan PMI. Disagigireun ti éta ogé dijelaskeun, salian ti méré P3K, ogé méré palayanan cék atawa pamariksasan kaséhatan haratis jeung fasilitas Ambulance. Tah ku ayana éta hal téh, saupama aya masarakat anu ngabutuhkeun Ambulance jeung P3K, Ambulance baris sagancangna ngajugjug ngadatangan éta masarakat.

Leuwih jauh Ketua PMI Kota Sukabumi ngajelaskeun, dibukana Posko 24 jam téh, meunang pangbagéa jeung antusias ti sakumna lapisan masarakat. Sabab dina mangsa aya kacilakaan di sabudeureun Markas PMI, bisa langsung diungkulan ku para Rélawan PMI Kota Sukabumi. Ketua PMI Kota Sukabumi ngaharepkeun, ku dibukana Posko 24 jam téh, aya mangpaatna pikeun masarakat, hususna anu ngarandapan kacilakaan.

Sedengkeun Ketua Widang Rélawan PMI Kota Sukabumi, Zaini ngajelaskeun, pikeun ngarojong kalancaran jeung nguatan kapasitas TRC (Tim Réaksi Cepet) Tim Pangawal Ambulance Darah, PMI Kota Sukabumi geus méré palatihan ka 15 urang Rélawan PMI anu ngagabung dina Tim Pangawal Ambulance Darah atawa Kelompok IĚA PMI Kota Sukabumi. Maksud jeung tujuannana, nya éta pikeun ngaronjatkeun sistim koordinasi anu inténsif jeung leuwih hadé, sarta sabagé panduan pikeun Rélawan PMI anu ngagabung dina TRC Pangawal Ambulance Darah, dina ngalaksanakeun pancén sacara cepet jeung tepat.

Tah ku lantaran kitu, dina éta palatihan téh teu dipuseurkeun kana hiji arah ti nara sumber wungkul, tapi ogé dipuseurkeun kana diskusi jeung studi kasus sarta simulasi dina ngalaksanakeun Pangawalan Ambulance Darah di lapangan. Sabab TRC Pangawal Ambulance Darah téh ngarupakan ujung tumbak dina kaamanan darah. Tah ku hal éta téh, darah teu ngarandapan karuksakan salilla di pajalanan, sarta teu ngaganggu kana fungsi palayanan umum UTD (Unit Transfusi Darah) PMI Kota Sukabumi.

Leave a Reply