WAKIL WALI KOTA SUKABUMI MILUAN PROGRAM ĚCONOMIC LÉADERSHIP FOR RÉGIONAL GOVERNMENT LÉADER

Reporter / Redaktur : ENDANG SUMARDI

Wakil Wali Kota Sukabumi, H. Andri S. Hamami, S.H., M.H., salila 3 poé, cindekna ti tanggal 24 nepi ka tanggal 26 Oktober 2018, miluan Program Ěconomic Léadership for Régional Government Léader Angkatan Ka 4 Taun 2018, di Gedong Bank Indonésia Jakarta. Ěta kagiatan anu diiluan ku 35 unsur Pingpinan Daérah anu ngawengku ti Bupati, Wali Kota, Ketua DPRD katut Kapolres ieu téh, dibuka sacara resmi ku Deputi Gubernur Bank Indonésia, Pérry Warjiyo, cindekna tanggal 24 Oktober 2018.

Sakumaha anu dijelaskeun ku Wakil Wali Kota Sukabumi, éta kagiatan téh ngarupakeun kolaborasi Bank Indonésia jeung sababaraha lembaga, anu ngawengku ti Lemhanas (Lembaga Katahanan Nasional), Apkasi (Asosiasi Pemerintah Kabupatén Seluruh Indonésia), Apeksi (Asosiasi Pemerintah Kota Seluruh Indonésia), Adkasi (Asosiasi DPRD Kabupatén Seluruh Indonésia), Adeksi (Asosiasi DPRD Kota Seluruh Indonésia) katut Polri. Maksud jeung tujuannana, diantarana pikeun ngawujudkeun pangwangunan SDM (Sumber Daya Manusa) Nasional katut kapamingpinan anu ngabogaan ajén hadé.

Salajuna dijelaskeun, Bank Indonésia hayang ngabantu, ngarojong jeung nyukséskeun Pingpinan Daérah Kabupatén jeung Kota katut DPRD Kabupatén jeung Kota sarta Polri di Indonésia, hususna dina ngalaksanakeun réformasi struktural jeung ngahangkeutkeun pangwangunan ékonomi régional. Anapon sala sahiji strategina, nya éta ngaliwatan pangembangan SDM anu ngabogaan ajén hadé, dina kapamingpinan ékonomi daérah jeung nasional. Tah ku sabab kitu, Deputi Gubernur Bank Indonésia ngaharepkeun, sangkan para Pingpinan Daérah bisa nyiptakeun rupa-rupa torobosan jeung inovasi, sarta jadi Pembaharu Ěkonomi Régional Indonésia.

Salian ti éta ogé dijelaskeun, Program Ěconomic Léadership for Régional Government Léader anu dicalagarakeun ku Bank Indonésia ngaliwatan Bank Indonésia Institute téh, ngarupakeun program pikeun mekelan jeung ngembangkeun kapamingpinan, ngaliwatan kurikulum anu inovatif jeung sifatna transformatif. Disagigireun ti éta, ngaliwatan ieu program téh diharepkeun bsa ngarojong lahirna Pingpinan Daérah anu ngabogaan ajén hadé, nya éta salian ti masagi dina kompeténsina sabagé pamingpin anu profésional, ogé mibanda integritas jeung kapamingpinan anu luhur.

Leuwih jauh Wakil Wali Kota Sukabumi ngajelaskeun, hasil tina Program Ěconomic Léadership for Régional Government Léader ieu téh, baris diterapkeun jeung dimekarkeun sacara optimal di Kota Sukabumi, pikeun ngaronjatkeun jeung ngamekarkeun pangwangunan ékonomi di Kota Sukabumi, sakaligus pikeun ngarojong Ěkonomi Régional Indonésia.

Leave a Reply