SMP NEGRI 16 KOTA SUKABUMI JUARA KA 2 LSS TINGKAT NASIONAL TAUN 2018

Reporter / Redaktur : ENDANG SUMARDI

SMP Negri 16 Kota Sukabumi, hasil nyangking gelar juara ka 2 LSS (Lomba Sakola Séhat) Tingkat Nasional Taun 2018, pikeun kategori sakola anu ngahontal hasil pang hadéna atawa bést achievemént, sarta meunang layang pangajén, trophy jeung duit pangbinaan gedéna Rp. 25 juta. Ěta layang pangajén, trophy jeung duit pangbinaan téh, dipasrahkeun ku Dirjén (Diréktur Jéndral) Otonomi Daérah Kamentrian Dalem Negri RI, Soni Sumarsono, ka Wakil Wali Kota Sukabumi, H. Andri S. Hamami, S.H., M.H., dibarengan ku Kapala SMP Negri 16 Kota Sukabumi, Agus Budiman, M.Pd., katut para juara LSS liana, di Ballroom Hotél Aryaduta Jakarta, cindekna tanggal 25 Oktober 2018.

Dina kasempetan éta, Wakil Wali Kota Sukabumi ngawilujengkeun sarta ngahaturkeun nuhun ka SMP Negri 16 Kota Sukabumi, anu geus hasil nyangking gelar juara ka 2 LSS Tingkat Nasional Taun 2018. Lantaran éta hasil anu dicangking ku SMP Negri 16 Kota Sukabumi téh, salian jadi sala sahiji kareueus pikeun sakumna pihak, boh pamaréntah boh masarakat Kota Sukabumi hususna kulawarga besar SMP Negri 16 Kota Sukabumi, ogé geus nyambuangkeun wawangi ngaran hadé Kota Sukabumi di kancah Nasional. Sabab dina LSS Tingkat Nasional Taun 2018 téh, aya 96 sakola ti 25 propinsi sa Indonésia anu ditetepkeun nyumponan pasaratan miluan LSS, pikeun kategori sakola anu ngahontal kinerja pang hadéna jeung pikeun kategori sakola anu ngahontal hasil pang hadéna.

Wakil Wali Kota Sukabumi ngajelaskeun, ku hasilna SMP Negri 16 Kota Sukabumi hasil nyangking gelar juara ka 2 LSS Tingkat Nasional Taun 2018 téh, ngarupakeun sala sahiji léngkah anu hadé dina ngawujudkeun jeung ngaronjatkeun sakaligus ngamekarkeun PHBS (Parilaku Hirup Bersih jeung Séhat), hususna di sakumna kalangan masarakat Kota Sukabumi. Lantaran PHBS téh, kudu dimimitian ti barudak sakola jeung pra sakola, supaya jadi budaya di sakumna kalangan masarakat Kota Sukabumi. Salian ti éta, ogé bisa ngarojong kana usaha ngahontal Visi Pangwangunan Kota Sukabumi Taun 2005-2025, nya éta Ngawujudna Kota Sukabumi Sabagé Puseur Palayanan anu ngabogaan ajén hadé dina Widang Atikan, Kaséhatan jeung Padagangan di Jawa Barat, anu didadasaran ku Iman jeung Taqwa.

Salajuna dijelaskeun, UKS (Usaha Kaséhatan Sakola) ngarupakeun sala sahiji usaha atikan jeung kaséhatan anu dilaksanakeun sacara padu, sadar, karancana, ngabogaan arah jeung tanggungjawab. Sedengkeun LSS jadi sala sahiji torobosan sarana pangbinaan jeung pangembangan sarta évaluasi palaksanaan program UKS, kaasup pikeun méré motivasi ka satiap sakola, supaya bisa ngaronjatkeun darajat kaséhatan sarta ajén lingkungan sakola jeung barudak atikna, Lian ti éta ogé dijelaskeun, dina LSS téh, anu diajén lain kaayaan fisik sakola wungkul, tapi anu leuwih penting jeung utama, nya éta ayana parobahan jeung paningkatan PHBS pamilon atik, anu bisa mangaruhan kana lingkungan rumah tangga jeung masarakat.

Leave a Reply