PAMARÉNTAH KOTA SUKABUMI MEUNANG DEUI LAYANG PANGAJÉN OPINI WTP

Reporter / Redaktur : ENDANG SUMARDI

Pamaréntah Kota Sukabumi meunang deui Layang Pangajén Opini WTP (Wajar Tanpa Pangacualian) ti Pamaréntah Puseur, ku hasilna nyusun LKPD (Laporan Kauangan Pamaréntah Daérah) Taun Anggaran  2017, pikeun kaopat kalina sacara terus-terusan, cindekna ti taun 2014 nepi ka taun 2017. Ěta Layang Pangajén téh dipasrahkeun ku Kapala Kanwil (Kantor Wilayah) DJPB (Diréktorat Jéndral Perbendaharaan) Propinsi Jawa Barat, Yuniar Yanuar Rasyid, dibarengan ku Kapala BPK (Badan Pamariksa Kauangan) Pawakilan Jawa Barat, Arman Syifa, ka Wakil Wali Kota Sukabumi,. H. Andri S. Hamami, S.H., M.H., cindekna tanggal 31 Oktober 2018, di Gedong DJPB Propinsi Jawa Barat, dina Rakor (Rapat Koordinasi) Akutansi jeung Palaporan Kauangan Pamaréntah Daérah, anu dibuka sacara resmi ku Wakil Gubernur Jawa Barat, UU Ruzhanul Ulum.

Kapala Kanwil DJPB Propinsi Jawa Barat, Yuniar Yanuar Rasyid ngajelaskeun, hasil hontalan LKPP (Laporan Kauangan Pamaréntah Puseur) jeung LKPD, geus dipidangkeun sacara wajar kana sagala rupa aspék material, luyu jeung SAP (Standar Akutansi Pamaréntah), sarta geus dilaksanakeunnana sistim pangadalian internal anu éféktif jeung éfisién. Salian ti éta, ogé geus dicumponannana sakabéh katangtuan paraturan jeung undang-undang anu ditetepkeun. Saterusna diharepkeun, éta hal téh bisa terus dilaksanakeun sacara optimal jeung terus-terusan, pikeun ngaronjatkeun ajén LKPD jeung ngaronjatkeun integritas para pangalola kauangan di sakumna SKPD (Satuan Kerja Parangkat Daérah) Pamaréntahan, sarta pikeun ngahontal aspék mangpaat anu sagedé-gedéna pikeun kamamuran jeung kasajahtraan rahayat.

Sedengkeun Wakil Wali Kota Sukabumi, H. Andri S. Hamami, S.H., M.H. nandeskeun, ieu Layang Pangajén téh ngarupakeun aprésiasi pikeun SKPD di Kota Sukabumi. Tah ku lantaran kitu, Wakil Walikota Sukabumi ngaharepkeun, ka hareup sakumna SKPD di Kota Sukabumi bisa leuwih ngabogaan deui prestasi, hususna dina nyusun LKPD, anu pamustungannana Layang Pangajén Opini WTP ti Pamaréntah Puseur téh bisa dipertahankeun jeung dironjatkeun. Salajuna dijelaskeun, ieu Layang Pangajén Opini WTP téh bisa dicangking ku alpukah jeung gawé anu rancagé ti Tim BPKD (Badan Pangalolaan Kauangan Daérah) Kota Sukabumi jeung sakumna SKPD di Kota Sukabumi, kaasup instansi jeung lembaga nu aya kaitannana katut masarakat Kota Sukabumi. Saterusna diharepkeun, ku dicangkingna deui ieu Layang Pangajén téh, bisa mupus rasa kacapé Tim BPKD Kota Sukabumi jeung sakumna SKPD di Kota Sukabumi, hususna dina nyusun LKPD anu hadé jeung bener.

Leave a Reply