PAMARÉNTAH KOTA SUKABUMI NGALAKSANAKEUN NKB AWAL JEUNG UI

Reporter / Redaktur : ENDANG SUMARDI

Pamaréntah Kota Sukabumi ngalaksanakeun NKB (Nota Kasaluyuan Bareng) Awal jeung UI (Universitas Indonésia) dina widang atikan, panalitian jeung pangabdian ka masarakat, ku cara ngamangpaatkeun sumber daya anu dipibanda ku kadua beulah pihak. Ěta NKB téh ditandatangan ku Wali Kota Sukabumi, H. Achmad Fahmi jeung pihak UI, dina acara I-Gov UI Ěxpo 2018, cindekna tanggal 31 Oktober 2018, di Balérung Kampus UI Dépok.

Wali Kota Sukabumi ngajelaskeun, sobat-sobat di UI mibanda niat jeung patékadan pikeun ngawangun Kota Sukabumi dina rupa-rupa aspék jeung widang, hususna dina widang atikan, panalitian jeung pangabdian ka masarakat, luyu jeung Visi Pangwangunan Kota Sukabumi Taun 2005-2025, nya éta Ngawujudna Kota Sukabumi Sabagé Puseur Palayanan anu ngabogaan ajén hadé dina Widang Atikan, Kaséhatan jeung Padagangan di Jawa Barat, anu didadasaran ku Iman jeung Taqwa.

Salajuna dijelaskeun, ku diuntunna éta NKB téh bisa méré pangaruh anu hadé pikeun Kota Sukabumi, hususna dina ngadorong jeung ngahangkeutkeun pangwangunan dina widang atikan, panalitian jeung pangabdian ka masarakat di Kota Sukabumi. Lantaran ku diuntunna éta NKB téh, bisa muka leuwih lega kana kolaborasi jeung kamitraan antara Pamaréntah Kota Sukabumi jeung UI dina widang atikan jeung risét dina sagala rupa widang, kaasup dina usaha ngaréngsékeun rupa-rupa masalah anu kajadian jeung anu disanghareupan di Kota Sukabumi.

Leuwih jauh dijelaskeun, pihak UI geus siap nerapkeun Smart City atawa Kota Cerdas di Kota Sukabumi, sarta baris dijadikeun sala sahiji pacontohan ku UI. Tah ku sabab kitu, pihak UI dina danget ieu keur museur ngalaksanakeun rupa-rupa pasiapan jeung parancanaan program Smart City, pikeun diterapkeun jeung dilaksanakeun di Kota Sukabumi. Salian ti éta ogé dijelaskeun, tina 25 Kota jeung Kabupatén sa Indonésia anu kapilih dina tahap munggaran Gerakan Nuju 100 Smart City, Kota Sukabumi kapilih sabagé kota pang hadéna Gerakan Nuju 100 Smart City di Indonésia Taun 2017.

Wali Kota Sukabumi nandeskeun, Pamaréntah Kota Sukabumi geus siap ngalaksanakeun program Smart City, sabab sakumna SKPD (Satuan Kerja Parangkat Daérah) di lingkungan Pamaréntah Kota Sukabumi geus ngabogaan aplikasi sorangan. Maksud jeung tujuannana, supaya sakumna lapisan masarakat bisa leuwih gampang ngaaksés rupa-rupa béwara anu dibutuhkeun. Disagigireun ti éta, pihakna katut sakumna unsur pingpinan di lingkungan Pamaréntah Kota Sukabumi, baris salawasna usaha satékah ngarojong sakaligus ngalaksanakeun Smart City di Kota Sukabumi, luyu jeung pesatna katut kamekaran téhnologi informasi danget ieu.

Leave a Reply