BUNDA LITERASI KOTA SUKABUMI NGAJAK NGADONGÉNG KA MASARAKAT

Reporter : PKL

Redaktur/Editor : ENDANG SUMARDI

Bunda Literasi Kota Sukabumi, Hj. Fitri Hayati Fahmi, S,Ag., M.M.Pd., dibarengan ku Kapala Dispusip (Dines Perpustakaan jeung Kaarsipan) Kota Sukabumi, Nicke Siti Rahayu, S.H., M.H., ngadongdon 7 Kecamatan di Kota Sukabumi, pikeun ngawanohkeun sakaligus ngajak ngadongéng ka masarakat, anu ngangkat téma Nanjeurkeun Budaya Literasi di Kota Sukabumi anu Religieus, Ayem jeung Sajahtra. Ěta kagiatan anu dimimitian di Kecamatan Cikolé jeung Citamiang téh, cindekna tanggal 22 Juli 2019, dijadwalkeun lumangsung nepi ka tanggal 31 Juli 2019.

Dina biantarana, Bunda Literasi Kota Sukabumi, Hj. Fitri Hayati Fahmi, S,Ag., M.M.Pd. ngajelaskeun, maksud jeung tujuan dilaksanakeunnana ieu kagiatan téh, diantarana pikeun ngaraksa jeung ngariksa sakaligus ngamumulé dongéng. Sabab dina danget ieu, dongéng téh geus arang langka diwanohkeun jeung ditepikeun ka barudak ku nu jadi kolot-kolotna.

Salian ti éta, ogé pikeun ngaronjatkeun minat literasi sakaligus ngadorong masarakat, sangkan ngabiasakeun deui ngadongéng ka barudakna. Lantaran ku éta hal téh, bisa ngaraketkeun jeung mageuhan sakaligus ngaronjatkeun hubungan antara kolot jeung barudakna.

Dina bagian séjén biantarana, Bunda Literasi sakaligus sabagé Ketua TP PKK Kota Sukabumi, meredih jeung ngawajibkeun ka para Kader PKK, supaya jadi Anggota Perpustakaan Kota Sukabumi, sakaligus ngaronjatkeun jeung ngabudayakeun literasi jeung ngadongéng ka barudak.

Sedengkeun Kapala Dispusip Kota Sukabumi, Nicke Siti Rahayu, S.H., M.H. ngajelaskan, dilaksanakeunnana ieu kagiatan téh, dina raraga usaha ngahontal Visi Wali Kota katut Wakil Wali Kota Sukabumi, nya éta Ngawujudkan Kota Sukabumi anu Réligieus, Ayem jeung Sajahtra. Lian ti éta, ogé pikeun ngaronjatkeun minat baca barudak jeung kolot-kolotna kaasup ngadongéng.

Ieu kagiatan téh direuah-reuah ku pintonan dongéng Ki Déwa jeung palajar SDN CBM Dewi Sartika Kota Sukabumi, Falisha Zalfa Ayla, sabagé Juara 3 Ngadongéng Tingkat Provins Jawa Barat. Disagigireun ti éta, ieu kagiatan téh diiluan ku TP PKK jeung para Guru SD nepi ka SMA sadarajat, sarta dihadiran ku para Camat katut réngréngannana.

Leave a Reply