PASIAPAN NGEUNAAN PALAKSANAAN PROGRAM DANA KALURAHAN TAUN 2019

Reporter/Redaktur/Editor : ENDANG SUMARDI

Pamaréntah Kota Sukabumi, terus ngalaksanakeun rupa-rupa pasiapan ngeunaan palaksanaan program dana kalurahan taun 2019. Diantarana ngalaksanakeun Rakor (Rapat Kordinasi) Kawilayahan, di Villa Cantik, Kalurahan Dayeuhluhur, Kacamatan Warudoyong, Kota Sukabumi, sawatara poé ka tukang. Ěta Rakor Kawilayahan anu dipingpin ku Wakil Wali Kota Sukabumi, H. Andri S. Hamami, S.H., M.H., dibarengan ku Asistén Pamaréntahan Setda Kota Sukabumi, Drs. H. Andri Setiawan, M.M. téh, diiluan ku Camat jeung Lurah sa Kota Sukabumi.

Dina kasempetan éta, Wakil Wali Kota Sukabumi  ngajelaskeun, dina taun 2019 Kota Sukabumi meunang DAU (Dana Alokasi Umum) tambahan gedéna Rp. 11.064.053.000,00, pikeun 33 kalurahan sa Kota Sukabumi, atawa masing-masing kalurahan gedéna Rp. 352.000.000,00, pikeun pangwangunan sarana jeung prasarana kalurahan sarta pangbardayaan masarakat di kalurahan.

Salajuna dijelaskeun, rupa-rupa usaha pasiapan palaksanaan dana kalurahan téh geus dilaksanakeun sacara optimal. Diantarana pangeusian jabatan struktural pikeun aparat kalurahan, boh lurah boh para kasi di kalurahan, dina raraga usaha nyumponan KPA (Kawasa Pangguna Anggaran), PPTK (Pajabat Palaksana Téknis Kagiatan) jeung BPP (Bendahara Pangaluaran Pembantu).

Salian ti éta, ogé dilaksanakeun bingbingan pikeun KPA, PPTK jeung BPP, hususna nu aya kaitannana jeung pangalolaan, panatausahaan jeung pananggungjawaban kauangan daérah. Anapon maksud jeung tujuan dibéréna dana kalurahan téh, diantarana pikeun ngahangkeutkeun jeung pamarataan panwangunan di kalurahan, hususna nu bisa ngarojong kana paningkatan kasajahtraan masarakat.

Disagigireun ti éta, Wakil Wali Kota Sukabumi meredih ka para camat jeung lurah, sangkan salawasna ngalaksanakeun komunikasi jeung SKPD (Satuan Kerja Parangkat Daérah) nu aya kaitannana, hususna nu aya tumalina jeung palaksanaan katut panggunaan dana kalurahan sarta paningkatan ajén palayanan ka masarakat. Lantaran dibéréna dana kalurahan téh, targétna nya éta pikeun ngaronjatkeun ajén palayanan ka masarakat dina rupa-rupa séktor pamaréntahan.

Lian ti éta, satiap kacamatan jeung kalurahan di Kota Sukabumi, sangkan salawasna ngalaksanakeun inovasi jeung kréativitas, supaya kasajahtraan masarakat bisa dironjatkeun. Anu teu éléh penting, para camat jeung lurah bisa ngagunakeun téknologi informasi, pikeun ngagampangkeun jeung ngirit waktu dina méré palayanan ka masarakat. Sabab ku éta hal téh, Visi Wali Kota katut Wakil Wali Kota Sukabumi, nya éta Ngawujudna Kota Sukabumi anu Réligieus, Ayem jeung Sajahtra bisa dihontal sacara hadé jeung lancar.

Leave a Reply