DISKOMINFO KOTA SUKABUMI MEUNANG PANCÉN PIKEUN NGAWUJUDKEUN SATU DATA INDONÉSIA

Reporter : ARIF HIDAYAT

Redaktur/Editor : ENDANG SUMARDI

Sajumlah 3 instansi anu ngawengku 2 instansi pamaréntah daérah jeung 1 instansi vértikal, meunang pancén pikeun ngawujudkeun Satu Data Indonésia. Anapon ka 3 éta instansi téh nya éta Bappeda (Badan Parancanaan Pangwangunan Daérah) Kota Sukabumi sabagé instansi anu tanggung jawab dina parancanaan pangwangunan, BPS (Badan Pusat Stastistik) Kota Sukabumi anu tanggung jawab dina statistik, sarta Diskominfo (Dines Komunikasi jeung Informatika) Kota Sukabumi anu tanggung jawab dina pangalolaan jeung nyebarluaskeun data.

Éta hal téh kaungkab dina acara FGD (Focus Group Discussion) Publikasi Kota Sukabumi Dalam Angka Taun 2019, sawatara poé ka tukang, di Hotél Horison Kota Sukabumi. Kagiatan anu dibuka sacara resmi ku Wali Kota Sukabumi, H. Achmad Fahmi téh, ngangkat téma Satu Data Indonésia pikeun Kota Sukabumi.

Wali Kota Sukabumi, H. Achmad Fahmi, dina biantarana ngajelaskeun kacida ngarojongna kana ngawujudna Satu Data Indonésia téh, lantaran nepi ka danget ieu masalah nu aya kaitannana jeung data katut akses data téh sok aya pabédaan. Sedengkeun data téh kacida diperlukeunnana, supaya satiap kawijakan anu diterapkeun bisa akurat jeung tepat. Sabagé sala sahiji contona, data kamiskinan sok aya pabédaan, lantaran satiap instansi ngabogaan indikator anu béda-béda. Ku sabab kitu, gawé bareng anu rancagé antara instansi kacida diperlukeunnana, luyu jeung Paraturan Persidén Nomer 39 Taun 2019, supaya bisa ngahasilkeun Satu Data Indonésia pikeun Kota Sukabumi.

Nyigeung sénsus padumuk anu baris dilaksanakeun dina taun 2020, Wali Kota Sukabumi nginstruksikeun, sakumna pihak kudu ngajak masarakat pikeun ilubiung jeung aktif sabagé réspondén dina éta sénsus. Saterusna dijelaskeun, sénsus pandumuk taun 2020, salian dilaksanakeun sacara langsung ku ngadatangan réspondén, ogé baris dilaksanakeun sacara daring atawa online.

Sedengkeun Kapala BPS Kota Sukabumi, Saman, S.Si. ngajelaskeun, nurutkeun Paraturan Persidén Nomer 39 Taun 2019 ngeunaan Satu Data, ka 3 instansi di tingkat daérah kudu sabilulungan jeung gawé bareng, pikeun ngawujudkeun Satu Data Indonésia. Anapon instansi nu séjénna, boh instansi pamaréntah daérah boh vértikal, kudu ilubiung jeung aktip sabagé supplier atawa panyadia data.

Éta kagiatan FGD Publikasi Kota Sukabumi Dalam Angka Taun 2019 téh, dieusi diskusi antara para pamilon jeung nara sumber, nya éta Kapala BPS Kota Sukabumi katut Asistén Paékonomian jeung Pangwangunan Setda Kota Sukabumi, Ir. H. Cécép Mansur, M.M. Sedengkeun  pamilon éta FGDF téh, ngawengku ti pawakilan instansi pamaréntah daérah jeung instansi vértikal.

Leave a Reply