DISKOMINFO KOTA SUKABUMI BARIS USAHA SATÉKAH POLAH NGAWUJUDKEUN SATU DATA

Reporter : ARIF HIDAYAT

Redaktur/Editor : ENDANG SUMARDI

Diskominfo (Dines Komunikasi jeung Informatika) Kota Sukabumi, baris usaha satékah polah ngawujudkeun satu data. Anapon pikeun ngawujudkeun éta usaha téh, diantarana ku nyalagarakeun Rakor (Rapat Kordinasi) Panyalagaraan Data Séktoral Daérah jeung Statistik Tingkat Kota Sukabumi, cindekna tanggal 7 Agustus 2019, di Hotél Balcony Kota Sukabumi, anu dibuka sacara resmi ku Sekertaris Daérah Kota Sukabumi, Drs. H. Dida Sembada, M.M.

Dina biantarana, Sekertaris Daérah Kota Sukabumi nandeskeun, ku ayana pangalolaan data jeung statistik ku Diskominfo téh, diharepkeun ayana data valid anu geus kavérifikasi. Sabab posisi Diskominfo téh nya éta sabagé Wali Data, Bappeda (Badan Parancanaan Pangwangunan Daérah) sabagé Pangbina Data, jeung SKPD (Satuan Kerja Parangkat Daérah) lainna sabagé Produsén Data. Ku ayana pangbagian éta peran téh, diharepkeun bisa muncul satu data, anu bisa dijadikeun bahan jeung réferénsi dina nangtukeun kawijakan.

Sededngkeun Kapala Diskominfo Kota Sukabumi, Drs. H. Gabril Majid Sukarman, M.Pd. ngajelaskeun, dilaksanakeunnana Rakor Panyalagaraan Data Séktoral Daérah jeung Statistik Tingkat Kota Sukabumi téh kacida penting jeung strategis, lantaran geus dirilisna Paraturan Persidén Nomer 39 Taun 2019 ngeunaan Satu Data Indonésia.

Éta paraturan téh ngaamanatkeun ngawujudna satu data anu akurat jeung bisa ditanggungjawabkeun, sabagé landesan pangwangunan. Salajuna dijelaskeun, usaha pikeun ngawujudkeun satu data téh, dina danget ieu geus digunakan SIMDASI (Sistim Informasi Manajemén Data Kaintegrasi), anu dikalola ku BPS (Badan Pusat Statistik).

Kapala Diskominfo Kota Sukabumi ngaharepkeun, ku ngaliwatan Rakor Panyalagaraan Data Séktoral Daérah jeung Statistik téh, para pamilon anu ngawerngku ti pawakilan SKPD téh, bisa paham kana peranna masing-masing dina ngalaksanakeun pangalolaan data, anu pamustungannana manajemén data bisa lumangsung kalayan hadé, sarta akurat jeung tepat waktu.

Éta Rakor téh ngahadirkeun nara sumber Kasubdit Komunikasi, Informatika jeung Pasandian Kamentrian Dalem Negri, Tommy Nugraha, Kapala Widang Statistik Diskominfo Provinsi Jawa Barat, Ida Ningrum S.Si., M.Pd., sarta Kapala BPS Kota Sukabumi, Saman, S.Si. Anapon matéri anu ditepikeun, diantarana ngeunaan Satu Data Indonésia katut Panyalagaraan Data Séktoral Daérah jeung Statistik.

Leave a Reply