PAMARÉNTAH KOTA SUKABUMI USAHA SATÉKAH POLAH NGAMAJUKEUN KOPRASI

Reporter/Redaktur/Editor : ENDANG SUMARDI

Sakumaha anu ditandeskeun ku Wakil Wali Kota Sukabumi, H. Andri S. Hamami, S.H., M.H., Pamaréntah Kota Sukabumi salawasna usaha satékah polah, pikeun terus ngamajukeun jeung ngamekarkeun koprasi di Kota Sukabumi, diantarana ku cara terus ngadorong lahirna Koprasi S-Mart (Sukabumi Mart), di 33 kalurahan sa Kota Sukabumi.

Lantaran sakumna koprasi di Kota Sukabumi téh, kudu terus maju jeung mekar. Ku sabab kitu, Pamaréntah Kota Sukabumi ngagulirkeun program S-Mart, anu dikalola jeung dimekarkeun ku koprasi, sarta Pamaréntah Kota Sukabumi nargétkeun, di satiap kalurahan di Kota Sukabumi, ngabogaan saeutikna hiji Koprasi S-Mart.

Panandesan Wakil Wali Kota Sukabumi éta téh, ditepikeun dina acara Pangéling-ngéling Ka 72 Poé Koprasi Taun 2019 Tingkat Kota Sukabumi, tanggal 7 Agustus 2019, di Hotél Maxoné Kota Sukabumi, anu ngangkat téma, Sumangat babarengan dina ngamekarkeun koprasi di éra milénial, nuju Kota Sukabumi anu réligieus, ayem jeung sajahtra, sakaligus ngaresmikeun Koprasi S-Mart anu munggaran, cindekna di Jalan Otista, Kalurahan Citamiang, Kacamatan Citamiang, Kota Sukabumi.

Dina pangéling-ngéling éta poé koprasi téh, hadir Sekertaris Kamentrian Koprasi jeung UKM (Usaha Kecil jeung Manengah), Prof. Dr. Rully Indrawan, M.Si., Kapala Diskop UKM-PP (Dines Koprasi, Usaha Kecil Manengah, Padagangan jeung Paindustrian) Kota Sukabumi, Drs. Ayép Supriatna, M.M., para palaku koprasi, sarta para tamu ondangan liainna.

Anapon ngeunaan saham S-Smart téh, nurutkeun Wakil Wali Kota Sukabumi, nya éta 70 peresén milik masarakat Kota Sukabumi ngaliwatan koprasi. Salajuna dijelaskeun, Koprasi S-Mart téh bagerak dina widang distribusi Sembako (Sembilan Bahan Poko), Simpan Pinjam jeung Koprasi Sagala Aya, sangkan rupa-rupa kabutuhan poko masarakat bisa dicumponan, sarta palayanannana dilaksanakeun sacara online, lain ritél manual.

Leuwih jauh dijelaskeun, Koprasi S-Mart téh baris ngabina warung-warung nu aya di wewengkonna masing-masing, sarta baris méré bantuan modal usaha masing-masing gedéna Rp. 5 juta mangrupa barang.

Sedengkeun Kapala Diskop UKM-PP Kota Sukabumi, Drs. Ayép Supriatna, M.M. ngajelaskeun, Pamaréntah Kota Sukabumi salawasna usaha ngadorong satiap koprasi di Kota Sukabumi, supaya ngabogaan kahayang pikeun maju. Saterusna dijelaskeun, di Kota Sukabumi danget ieu aya 325 koprasi. Ngan tina jumlah éta koprasi téh, nu aktif ngan ukur 192 koprasi.

Salian ti éta, tina jumlah éta koprasi téh, anu rutin ngalaksanakeun RAT (Rapat Anggota Taunan) ngan ukur 80 koprasi. Ku sabab kitu, dina taun 2019 ieu, Pamaréntah Puseur nurutkeun rarancangna baris ngabubarkeun 96 koprasi di Kota Sukabumi anu teu aktif.

Salajuna dijelaskan, Pamaréntah Kota Sukabumi ka hareup baris terus ngalaksanakeun pangbinaan ka satiap koprasi, supaya bisa terus maju jeung mekar, boh tina sisi manajemén boh tina sisi nu séjénna, supaya bisa medalkeun koprasi anu bisa ngaronjatkeun kasajahtraan ka para anggotana.

Leave a Reply