SAKUMNA OPD SANGKAN MÉRÉ KONTRIBUSI PIKEUN PANGWANGUNAN KOTA SUKABUMI

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi, meredih ka sakumna OPD (Organisasi Parangkat Daérah) jeung stake holder, sangkan sabilulungan jeung sauyunan méré kontribusi pikeun pangwangunan Kota Sukabumi, ka nu leuwih hadé deui. Éta pameredih téh ditepikeun basa mingpin Rakor (Rapat Kordinasi) Pingpinan OPD sa Kota Sukabumi Taun 2019, cindekna tanggal 5 Agustus 2019, di Vila Cantik Kalurahan Dayeuhluhur, Kacamatan Warudoyong, Kota Sukabumi.

Hadir dina kasempetan éta, Wakil Wali Kota Sukabumi, H. Andri S. Hamami, S.H., M.H., Sekertaris Daérah Kota Sukabumi, Drs. H. Dida Sembada, M.M., para Asistén Setda Kota Sukabumi, para Kapala OPD, sarta para Camat jeung Lurah sa Kota Sukabumi.

Saterusna dijelaskeun, ieu Rakor téh dipuseurkeun kana program kerja pikeun jangka waktu 5 taun ka hareup, sakaligus nyaluyukeun program jeung kagiatan taun 2019, sarta pasiapan palaksanaan Rancangan Awal RPJMD (Rancana Pangwangunan Jangka Manengah Daérah) Kota Sukabumi.

Salian ti éta, ogé dipuseurkeun kana pangwangunan taun 2019-2023, hususna dina nangtukeun arah kawijakan jeung prioritas pangwangunan, parancanaan program OPD sarta panjabaran visi misi Wali Kota katut Wakil Wali Kota Sukabumi. Salajuna dijelaskeun, poténsi pikeun maju kacida gedéna, saupama sakumna pihak sabilulungan jeung sauyunan, sakaligus ngalaksanakeun évaluasi kalembagaan pikeun ngaronjatkeun palayanan.

Disagigireun ti éta ogé dijelaskeun, Kota Sukabumi baris jadi tempat kagiatan Paméran TTG (Téknologi Tepat Guna) Tingkat Jawa Barat Taun 2019, cindekna ti tanggal 20 nepi ka tanggal 22 Agustus 2019, di Lapangan Merdéka Kota Sukabumi.

Ku sabab kitu, Wali Kota Sukabumi cumeluk ka para Kapala SKPD (Satuan Kerja Parangkat Daérah) katut réngréngannana, supaya sabilulungan jeung sauyunan ngarojong sakaligus nyukséskeun éta paméran. Lian ti éta ogé diharepkeun, éta paméran badag téh bisa dimangpaatkeun ku sakumna masarakat, pikeun ilubiung ngareuah-reuah éta paméran, diantarana ku mintonkeun kaulinan tradisional barudak.

Leave a Reply