UPACARA PANGÉLING-NGÉLING POĚ KAMERDÉKAAN TINGKAT KOTA SUKABUMI DIPUSEURKEUN DI LAPANGAN MERDÉKA

Reporter/Redaktur/Editor : ENDANG SUMARDI

Upacara Pangéling-ngéling Ka 74 Poé Kamerdékaan RI Taun 2019 Tingkat Kota Sukabumi, 17 Agustus 2019, nurutkeun rarancang baris dipuseurkeun di Lapangan Merdéka Kota Sukabumi, ti pukul 09.00 WIB nepi ka réngsé. Anapon nu jadi Inspéktur Upacara, Wali Kota Sukabumi, H. Achmad Fahmi, katut Cadangan Inspéktur Upacara, Wakil Wali Kota Sukabumi, H. Andri S. Hamami, S.H., M.H.

Salajuna Patugas Pangibar Duplikat Bendéra Pusaka Mérah Putih, Paskibraka (Pasukan Pangibar Bendéra Pusaka) Kota Sukabumi Taun 2019 jeung Paswalbraka (Pasukan Pangawal Pangibar Bendéra Pusaka), sarta Satuan Musik, Marching Band Gema Swara Kota Sukabumi.

Sedengkeun pamilon upacara, ngawengku ti Gabungan Perwira TNI jeung Polri, para Camat jeung Lurah, Kodim 0607 Kota Sukabumi, Yonif 310 Kidang Kancana, Yon Arméd 13 Nanggala Kostrad, Setukpa Lemdiklat Polri Sukabumi, Polres Sukabumi Kota, Dines Pahubungan, Sat Pol PP, Korpri, PGRI, PPI (Purna Paskbraka Indonésia), OKP (Organisasi Kapamudaan), Mahasiswa, Palajar, Pramuka jeung PMR.

Upacara Pangéling-ngéling Kamerdékaan RI Tingkat Kota Sukabumi téh, dieusi ku Ngaheningkeun Cipta miéling jasa-jasa para Pahlawan dipingpin ku Inspéktur Upacara, Pamacaan Naskah Pancasila, Pamacaan Naskah Pangbukaan Undang-Undang Dasar 1945, Pamacaan Naskah Proklamasi Kamerdékaan RI, jeung panekenan tombol sirineu miéling detik-detik Kamerdékaan RI ku Inspéktur Upacara salila samenit, dipirig ku rupa-rupa soara tatabeuhan jeung tembakan salto ku Pasukan TNI.

Salajuna para tamu anu diondang, numutkeun Sekertaris Daérah Kota Sukabumi salaku Pupuhu Panata Calagara Tetep Pangéling-ngéling Kamerdékaan RI Tingkat Kota Sukabumi, Drs. H. Dida Sembada, M.M., nya éta Pingpinan katut Anggota DPRD Kota Sukabumi, Kapala Setukpa Lemdiklat Polri Sukabumi, unsur Forkopimda (Forum Komunikasi Pingpinan Daérah) Kota Sukabumi, Komandan Sub Denpom Sukabumi, Komandan Yonif 310 Kidang Kancana, Komandan Yon Arméd 13 Nanggala Kostrad, sarta para mantén Wali Kota katut Wakil Wali Kota Sukabumi.

Saterusna para Asistén Setda Kota Sukabumi, para Kapala OPD (Organisasi Parangkat Daérah) jeung Instansi Vértikal, para Diréktur BUMD jeung BUMN, para Sesepuh, Alim Ulama, Inohong Masarakat, Kaum Cerdik Cendikia, para Perintis jeung Pajoang Kamerdékaan, Véteran, Angkatan 45, Warakawuri, Wirawati Catur Panca, Purnawirawan, PWRI, para Pupuhu Organisasi Kajoangan, Kamasarakatan, Wanoja jeung Kapamudaan, sarta para tamu ondangan lianna.

Leave a Reply