DÉSA-DÉSA DI JAWA BARAT STATUSNA GEUS NAÉK JADI DÉSA MAJU

Reporter : RIKSAN SATYAPRAWIRA

Redaktur/Editor : ENDANG SUMARDI

Gubernur Jawa Barat, Ridwan Kamil nandeskeun, para inovator di Jawa Barat, geus medalkeun karya luar biasa anu ngarojong kana pangwangunan désa-désa di Jawa Barat. Éta hal téh ditepikeun dina Gelar TTG (Téknologi Tepat Guna) Ka 9 Provinsi Jawa Barat, anu dilaksanakeun di Lapangan Merdéka Kota Sukabumi, cindekna dina poé kadua, tanggal 22 Agustus 2019 anyar-anyar ieu.

Salajuna Gubernur Jawa Barat ngaharepkeun, téknologi tepat guna anu dipintonkeun dina Gelar TTG Ka 9 téh, bisa diterapkeun sacara gancang di masarakat, sarta pangaruhna bisa karasa hususna dina ngaronjatkeun kasajahtraan masarakat.

Nyigeung pangwangunan désa, numutkeun Gubernur Jawa Barat, danget ieu geus taya désa di Jawa Barat anu statusna katinggaleun jeung désa mekar, sabab désa-désa di Jawa Barat statusna geus naék jadi désa maju. Naékna status désa téh ngarupakeun sala sahiji pangwangunan anu dihangkeutkeun di Jawa Barat, anu didorong ku inovasi Pamaréntah Provinsi Jawa Barat, saperti Maskara (Mobil Aspirasi Kampung Juara), Patriot Desa, 1 Désa 1 Tahfidz Qur’an, jeung Talisa (Pusat Digital Désa).

Dina éta kasempetan, Gubernur Jawa Barat nanda tangan MoU atawa gawé bareng jeung É-Fishéry, nya éta téknologi panebar parab lauk otomatis, ngagunakeun gawai atawa gadget. Nurutkeun Gubernur Jawa Barat, panerapan téknologi ngarupakeun hal anu kacida pentingna jeung wajib dilaksanakeun, hususna dina usaha ngawangun désa.

Lian ti éta ogé dijelaskeun, dina danget ieu aya sala sahiji téknologi anu keur diuji-coba, nya éta téknologi pikeun néangan jeung néwak lauk, anu diterapkeun ku para nalayan di Palabuhan Ratu Kabupatén Sukabumi.

Saterusna, Gubernur Jawa Barat masrahkeun layang pangajén ka para pamilon Gelar TTG pang hadéna, nya éta pikeun kategori inovasi jeung kategori unggulan, diantarana mesin pélét lauk ti Kota Sukabumi, alat melak paré ti Kabupatén Tasikmalaya, panél kontrol suhu cai dina balong jeung panebar parab lauk ti Kabupatén Kuningan.

Sedengkeun Kapala Dines PMD (Pangbardayaan Masarakat Désa) Provinsi Jawa Barat, Dédi Supéndi ngajelaskeun, sagemblengna aya 46 TTG anu dipintonkeun dina Gelar TTG Ka 9 di Kota Sukabumi. Salajuna dijelaskeun, para juara dina Gelar TTG ieu, boh tina kategori inovasi boh tina kategori unggulan, baris diilubiungkeun kana pangajénan TTG Tingkat Nasional.

Leave a Reply