GROUND BRÉAKING PANGWANGUNAN FLY OVER JALAN LINGKAR SELATAN KOTA SUKABUMI

Reporter : ARIF HIDAYAT

Redaktur/Editor : ENDANG SUMARDI

Gubernur Jawa Barat, Ridwan Kamil, ngalaksanakeun ground bréaking pangwangunan Fly Over Jalan Lingkar Selatan Kota Sukabumi, tepatna tanggal 21 Agustus 2019. Anapon nu hadir dina kasempetan éta, Wali Kota Sukabumi, H. Ahmad Fahmi, Wakil Wali Kota Sukabumi, H. Andri S. Hamami, S.H., M.H., Dandim 0607 Kota Sukabumi, Létkol Kav. Mujahidin, S.Sos., Kapolres Sukabumi Kota, AKBP Susatyo Purnomo Condro, S.H., S.I.K., M.Si., Sekertaris Daérah Kota Sukabumi, Drs. H. Dida Sembada, M.M., Kapala DBMPR (Dines Bina Marga jeung Panataan Rohang) Provinsi Jawa Barat, A. Koswara, para Asistén Setda Kota Sukabumi, para Kapala SKPD (Satuan Kerja Parangkat Daérah), jeung para tamu ondangan lianna.

Dina biantarana Gubernur Jawa Barat nandeskeun, Pamaréntah Provinsi Jawa Barat baris terus ngahangkeutkeun pangwangunan jalan jeung flyover di Jawa Barat. Anapon maksud jeung tujuan diwangunanna fly over ieu téh, nya éta pikeun ngalancarkeun patali marga sakaligus ngaronjatkerun paékonomian jeung kasajahtraan masarakat.

Saterusna dijelaskeun, pangwangunan ieu fly over téh, pikeun ngahubungkeun Jalan Lingkar Selatan Kota Sukabumi ka Jalan Sukaraja Kabupatén Sukabumi, anu palaksanaan pagawéannana ditargétkan salila 160 poé gawé, sarta baris méakeun waragad gedéna Rp. 33 miliar.

Anapon réalisasi pangwangunan Jalan Lingkar Selatan téh ngawengku 4 tahap. Nya éta tahap 1 ti Cibolang Kabupatén Sukabumi nepi ka Jalan Palabuhan 2 Kota Sukabumi sapanjang 6,90 kilo méter, tahap 2 ti Jalan Palabuhan 2 Kota Sukabumi nepi ka Jalan Baros Kota Sukabumi sapanjang 2,20 kilo méter, tahap 3 ti Jalan Baros Kota Sukabumi nepi ka wewengkon Kacamatan Sukaraja Kabupatén Sukabumi sapanjang 4,40 kilo méter anu kiwari keur dilaksanakeun, jeung tahap 4 ti wewegkon Kacamatan Sukaraja Kabupatén Sukabumi nepi ka Rumah Makan Nikmat Kabupatén Sukabumi sapanjang 5,50 kilo méter, anu baris dilaksanakeun dina taun 2020 nu bakal datang.

Sedengkeun Wali Kota Sukabumi ngajelaskeun, pangwangunan Fly Over Jalan Lingkar Selatan Kota Sukabumi téh, bisa ngalancarkeun patali marga di Kota Sukabumi, sarta bisa neken jeung ngurangan kamacétan di Kota Sukabumi, sakaligus ngaronjatkeun ajén palayanan ka masarakat dina widang tansportasi.

Salajuna Kapala DBMPR Provinsi Jawa Barat ngajelaskeun, dina ngagawéan pangwangunan ieu fly over téh ditargétkeun kudu réngsé dina ahir taun 2019. Lian ti éta ogé dijelaskeun, ieu Jalan Lingkar Selatan téh sabagé jalan panakulan nu ngahubungkeun jalan nasional ka arah Bogor jeung Cianjur sapanjang 19 kilo méter. Tina panjang éta jalan téh, geus diwangun nepi ka tahap 3 sapanjang 13,5 kilo méter, sarta sésana ngan ukur sapanjang 5,5 kilo méter deui.

Leave a Reply