PAMARÉNTAH KOTA SUKABUMI USAHA SATÉKAH POLAH NGAMAJUKEUN KOPRASI

Reporter/Redaktur/Editor : ENDANG SUMARDI

Sakumaha anu ditandeskeun ku Wakil Wali Kota Sukabumi, H. Andri S. Hamami, S.H., M.H., Pamaréntah Kota Sukabumi salawasna usaha satékah polah ngamajukeun jeung ngamekarkeun koprasi di Kota Sukabumi, diantarana ku cara terus ngadorong lahirna Koprasi S-Mart (Sukabumi Mart), di 33 kalurahan sa Kota Sukabumi.

Lantaran numutkeun Wakil Wali Kota Sukabumi, sakumna koprasi di Kota Sukabumi kudu terus maju jeung mekar. Ku sabab kitu, Pamaréntah Kota Sukabumi ngagulirkeun program S-Mart, anu dikalola jeung dimekarkeun ku koprasi, sarta Pamaréntah Kota Sukabumi nargétkeun, di satiap kalurahan d Kota Sukabumi, saeutikna aya hiji Koprasi S-Mart.

Ěta panandesan Wakil Wali Kota Sukabumi téh, ditepikeun dina biantara, dina acara Pangéling-ngéling Ka 72 Poé Koprasi Taun 2019 Tingkat Kota Sukabumi, anu dilaksanakeun di Hotél Maxoné Kota Sukabumi, sarta ngangkat téma, Sumanget ngahiji jeung babarengan dina ngamekarkeun koprasi di éra milenial, nuju Kota Sukabumi anu réligieus, ayem jeung sajahtra, sakaligus ngaresmieun Koprasi S-Mart anu munggaran, cindekna di Jalan Otista, Kalurahan Citamiang, Kacamatan Citamiang, Kota Sukabumi.

Dina acara Pangéling-ngéling Ka 72 Poé Koprasi Taun 2019 Tingkat Kota Sukabumi téh, hadir Sekertaris Kamentrian Koperasi jeung UKM (Usaha Kecil Menengah), Prof. Dr. Rully Indrawan, M.Si., Kapala Diskop UKM-PP (Dines Koprasi, Usaha Kecil Menengah, Padagangan jeung Paindustrian) Kota Sukabumi, Drs. Ayép Supriatna, M.M., para palaku koprasi, sarta para tamu ondangan lianna.

Anapon ngeunaan saham S-Smart téh, nurutkeun Wakil Wali Kota Sukabumi, nya éta 70 peresén milik masarakat Kota Sukabumi ngaliwatan koprasi. Salajuna dijelaskeun, Koprasi S-Mart téh bagerak dina bentuk distribusi Sembako (Sembilan Bahan Poko), Simpan Pinjam jeung Koprasi Sagala Aya, anu pamustungannana rupa-rupa kabutuhan poko masarakat bisa dicumponan, sarta palayanannana dilaksanakeun sacara online, lain ritél manual. Lian ti éta ogé dijelaskeun, Koprasi S-Mart téh baris ngabina warung-warung nu aya di wewengkonna masing-masing, sarta baris méré bantuan modal usaha masing-masing gedéna Rp. 5 juta dina bentuk barang.

Leave a Reply