BAGIAN HUMAS JEUNG PROTOKOL SETDA KOTA SUKABUMI JUARA KATILU PANGALOLAAN MÉDSOS

Reporter/Redaktur/Editor : ENDANG SUMARDI

Bagian Humas (Hubungan Masarakat) jeung Protokol Setda Kota Sukabumi, meunang pangajén sabagé juara katilu panghadéna, dina Pangalolaan Médsos (Média Sosial) Tingkat Kota jeung Kabupatén sa Jawa Barat, dina ajang Piala Humas Provinsi Jawa Barat Taun 2019. Sedengkeun juara kahiji dicangking ku Kota Bogor, sarta juara kadua ku Kota Bandung.

Ěta pangajén téh dipasrahkeun langsung ku Gubernur Jawa Barat, Ridwan Kamil, ka Wakil Wali Kota Sukabumi, H. Andri S. Hamami, S.H., M.H., anyar-anyar ieu, di Trans Luxury Hotél Kota Bandung. Kagiatan éta téh, sabagé sala sahiji pangajén ti Pamaréntah Provinsi Jawa Barat ka insan informasi, diantarana humas jeung protokol sarta dan jurnalis sa Jawa Barat.

Saréngséna nampa éta pangajén, Wakil Wali Kota Sukabumi, H. Andri S. Hamami, S.H., M.H., ngucap sukur Alhamdulillah ku dicangkingna éta téh. Saterusna dijelaskeun, éta pangajén téh sabagé sala sahiji bentuk aprésiasi Pamaréntah Provinsi Jawa Barat, kana kinerja kahumasan sa Jawa Barat, hususna dina béwara ka masarakat.

Ku sabab kitu, Wakil Wali Kota Sukabumi kalayan asmana Kapala Daérah katut Pamaréntah Kota Sukabumi, ngahaturkeun nuhun kana gawé rancagé anu dilaksanakeun ku sakumna aparatur dina widang kahumasan di lingkungan Pamaréntah Kota Sukabumi katut ka aparatur liana, anu panustrungannana Bagian Humas jeung Protokol Setda Kota Sukabumi meunang pangajén sabagé juara katili panghadéna dina Pangalolaan Médsos Tingkat Kota jeung Kabupatén sa Jawa Barat.

Wakil Wali Kota Sukabumi ngaharepkeun, ku meunangna ieu pangajén téh, bisa jadi pecut jeung panghudang sumanget pikeun Bagian Humas jeung Protokol Setda Kota Sukabumi katut Pamaréntah Kota Sukabumi, pikeun terus ngaronjatkeun kinerja, hususna dina méré béwara pangwangunan jeung palayanan publik ngaliwatan Médsos, sarta mangpaatna bisa dirasakeun ku masarakat.

Leave a Reply