PAMARÉNTAH KOTA SUKABUMI ANGGOTA JDIH PANG HADÉNA KA 1 SA INDONÉSIA

Reporter/Redaktur/Editor : ENDANG SUMARDI

Pamaréntah Kota Sukabumi meunang layang pangajén ti Mentri Hukum jeung HAM  (Hak Asasi Manusa) RI, Yasonna H. Laoly, sabagé Anggota JDIH pang hadéna ka 1 Tingkat Pamaréntah Kota sa Indonésia Taun 2019. Ěta layang pangajén téh dipasrahkeun ku Mentri Hukum jeung HAM RI, ka Wali Kota Sukabumi, H. Achmad Fahmi, dina sela-sela runtuyan Rakornas (Rapat Kordinasi Nasional) JDIH, cindekna tanggal 10 Séptémber 2019, di Jakarta, anu ngangkat téma, Panguatan Jaringan Dokuméntasi jeung Informasi Hukum Nasional dina raraga Ngahangkeutkeun Réformasi Hukum. Salian ti éta, ogé dina raraga ngalaksanakeun Paraturan Persidén RI Nomer 33 Taun 2012 ngeunaan Jaringan Dokuméntasi jeung Informasi Hukum Nasional.

Saréngséna nampa éta layang pangajén, Wali Kota Sukabumi dibarengan ku Asistén Pamaréntahan Setda Kota Sukabumi, Drs. H. Andri Setiawan, M.M., katut Kapala Bagian Hukum Setda Kota Sukabumi, Ěén Rukmini, S.H., M.H., ngucap sukur sarta ngarasa reueus bisa jadi Anggota JDIH pang hadéna ka 1 Tingkat Pamaréntah Kota sa Indonésia.

Salajuna dijelaskeun, éta prestasi téh ngarupakeun hasil gawé rancagé Bagian Hukum Setda Kota Sukabumi katut sakumna pihak anu kalibet dina ngaronjatkeun jeung ngamekarkeun JDIH di Kota Sukabumi. Disagigireun ti éta, ogé réa inovasi jeung kréativitas anu dilaksanakeun ku Bagian Hukum Setda Kota Sukabumi, dina ngaronjatkeun jeung ngamekarkeun JDIH. Diantarana ku diluncurkeunnana palayanan JDIH anu ngabogaan basis android. Lantaran ku éta hal téh, masarakat bisa meunang informasi produk hukum di Kota Sukabumi sacara gampang ngaliwatan HP.

Saterusna dijelaskeun, ku dicangkingna éta layang pangajén téh, bisa jadi pecut jeung panghudang sumanget keur Pamaréntah Kota Sukabumi, pikeun terus ngagulirkeun rupa-rupa inovasi jeung kréativitas dina ngaronjatkeun jeung ngamekarkeun palayanan JDIH di Kota Sukabumi. Lian ti éta ogé dijelaskeun, rupa-rupa inovasi jeung kréativitas dina ngaronjatkeun jeung ngamekarkeun JDIH téh, pikeun nyiptakeun sakaligus ngabentuk karakter masarakat Kota Sukabumi anu hadé jeung sadar hukum.

Leave a Reply