SALILA SATAUN MINGPIN KOTA SUKABUMI RÉA PROGRAM UNGGULAN ANU GEUS DIGULIRKEUN

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi katut Wakil Wali Kota Sukabumi, H. Andri S. Hamami, S.H., M.H., salila sataun mingpin Kota Sukabumi, cindekna ti saprak diistrénan sacara resmi ku Gubernur Jawa Barat, Ridwan Kamil, tanggal 20 Séptémber 2018 nu geus kalarung, di Gedong Merdéka Kota Bandung, réa program unggulan anu geus digulirkeun, sarta mangpaatna geus karasa ku masarakat, nya éta aya 10 program unggulan, hususna nu aya kaitannana jeung paningkatan palayanan kaséhatan, atikan, paékonomian jeung kasajahtraan masarakat. Ěta 10 program unggulan téh, ngawengku palayanan Homé Caré atawa Palayanan Kaséhatan jeung Ambulance Haratis Sigap (Siap jeung Ihlas Antar Jemput Pasén) 24 jam, sarta Klinik Soré di 3 Puskemas, nya éta Puskesmas Sukabumi, Puskesmas Selabatu jeung Puskesmas Baros.

Salajuna Rumah Singgah di Jalan Mulyasari Culdesac Nomer 7 RT 02 RW 04 Kalurahan Sukagalih, Kacamatan Sukajadi, Kota Bandung, pikeun istirahat atawa ngéndong sacara haratis para pasén jeung kulawarga pasén warga Kota Sukabumi, anu keur tatamba atawa dirawat di Kota Bandung, sarta Sukabumi Kece (Kalurahan Ěntrepreneurship Cénter), pikeun nyiptakeun wira usaha ngora anyar, anu dina saban taunna ditargétkan bisa nyiptakeun jeung nyitak réana 1.500 wira usaha ngora di Kota Sukabumi. Satuluyna SCH (Sukabumi Créative Hub), pikeun ngaronjatkeun jeung ngamekarkeun ékonomi kréatif di Kota Sukabumi. Malah dina taun 2020 baris diwangun gedong SCH dina lahan 1,2 héktar, pikeun nampung sakumna palaku ékonomi kréatif di Kota Sukabumi, sarta Gerakan Literasi, Gerakan Magrib Ngaji, Gerakan Sholat Subuh Barjama’ah jeung Aplikasi Super (Sukabumi Participated Résponder), sabagé sarana laporan jeung pangaduan sacara padu sarta gampang diaksés ku sakumna masarakat.

Wali Kota Sukabumi katut Wakil Wali Kota Sukabumi ngajelaskeun, sakumna éta program téh pikeun ngawujudkeun Visi Pangwangunan Kota Sukabumi, nya éta Ngawujudna Kota Sukabumi Sabagé Puseur Palayanan anu hadé dina Widang Atikan, Kaséhatan jeung Padagangan di Jawa Barat, anu didadasaran ku Iman jeung Taqwa; sarta Visi Wali Kota katut Wakil Wali Kota Sukabumi, nya éta Ngawujudna Kota Sukabumi anu Réligieus, Ayem jeung Sajahtra.

Salian réa program unggulan anu geus digulirkeun, ogé réa nyangking layang pangajén, nya éta aya 88 layang pangajén, anu ngawengku 33 layang pangajén tingkat nasional jeung 55 layang pangajén tingkat regional. Diantarana dina widang palayanan publik, pahubungan, hukum, ékonomi, kaséhatan, palindungan anak, lingkungan hirup jeung nu séjénna. Tina 88 éta layang pangajén téh, sajumlah 61 layang pangajén dipasrahkeun ka lembaga pamaréntahan, sakola, Wali Kota katut Wakil Wali Kota, sarta sajumlah 27 layang pangajén dipasrahkeun ka pasaurangan anu dibina ku Pamaréntah Kota Sukabumi.

Leave a Reply