DISKOP UKM-PP KOTA SUKABUMI MEUNANG LAYANG PANGAJÉN TI ICSB INDONÉSIA PRÉSIDÉNTIAL AWARD 2019

Reporter/Redaktur/Editor : ENDANG SUMARDI

Diskop UKM-PP (Dines Koprasi, Usaha Kecil Menengah, Padagangan jeung Paindustrian) Kota Sukabumi, meunang layang pangajén UKM (Usaha Kecil jeung Menengah) kategori Policy Maker, ti ICSB (International Counsil for Small Business) Indonésia Présidéntial Award 2019.

Ěta layang pangajén téh dipasrahkeun ku Wali Kota Bogor, Bima Arya, ka Kapala Diskop UKM-PP Kota Sukabumi, Drs. Ayép Supriatna, M.M., disaksian ku Wakil Wali Kota Sukabumi, H. Andri S. Hamami, S.H., M.H., dina kagiatan Galang UKM Indonésia 2019, di IPB International Convertation Cénter, Botani Square Building Bogor, anyar-anyar ieu. Kagiatan éta téh dilaksanakeun ku MarkPlus Inc ngaliwatan MarkPlus Institute, gawé bareng jeung Kamentrian KUKM (Koprasi, Usaha Kecil jeung Menengah) katut ICSB Indonésia.

Wakil Wali Kota Sukabumi dibarengan ku Kapala Diskop UKM-PP Kota Sukabumi ngucapkeun rasa syukur, yén Kota Sukabumi meunang ieu layang pangajén. Saterusna ngajelaskeun, ieu layang pangajén téh sabagé pangajén pikeun Pamaréntah Kota Sukabumi, anu salawasna mahatikeun kamekaran UKM di Kota Sukabumi.

Salian ti éta ogé ngajelaskeun, Pamaréntah Kota Sukabumi salawasna usaha satékah polah mahatikeun kamekaran UKM di Kota Sukabumi, ngaliwatan rupa-rupa program jeung kawijakan anu digulirkeun. Salajuna ngajelaskeun, ku meunangna ieu layang pangajén téh baris leuwih ngahudang sumanget jeung jadi pecut keur Pamaréntah Kota Sukabumi, pikeun terus ngamajukeun jeung ngamekarkeun UKM. Disagigireun ti éta ogé ngaraharepkeun, UKM Indonésia ngabogaan daya saéng anu luhur jeung teuneung, dina nyanghareupan pasaéngan anu mingkin kompetitif di tingkat global.

Wakil Wali Kota Sukabumi ogé ngajelaskeun, Pamaréntah Kota Sukabumi ngagulirkeun program Sukabumi Kécé (Kalurahan Ěntrepreuneurship Cénter), pikeun ngarojong kamekaran UKM di Kota Sukabumi, ku cara terus ngadorong masarakat supaya ngabogaan kamampuhan usaha, luyu jeung poténsi anu dipibanda. Saterusna ngajelaskeun, dina danget ieu aya 210 palaku usaha anu meunang pangbinaan ngaliwatan program Sukabumi Kécé, sarta diharepkeun bisa jadi palaku usaha anu maju jeung mandiri. (Sumber Bagian Humas jeung Protokol Setda Kota Sukabumi).

Leave a Reply