SÉRÉN SUMÉRÉN TANAH HIBAH TI PAMARÉNTAH KOTA SUKABUMI KA KAMENTRIAN HUKUM JEUNG HAM RI

Reporter : ARIF HIDAYAT

Redaktur/Editor : ENDANG SUMARDI

Wali Kota Sukabumi, H. Achmad Fahmi katut Kapala Kantor Imigrasi Kelas II Sukabumi, Nurudin, nanda-tangan naskah pajangjian jeung berita acara sérén sumérén hibah tanah ti Pamaréntah Kota Sukabumi ka Kamentrian Hukum jeung HAM (Hak Asasi Manusa) RI, cindekna tanggal 14 Oktober 2019, di Aula Kantor Imigrasi Kelas II Sukabumi, Jalan Lingkar Selatan Kota Sukabumi.

Anapon tanah anu dihibahkeun ku Pamaréntah Kota Sukabumi ka Kamentrian Hukum jeung HAM téh, legana 5.092 méter pasagi, sarta éta tanah téh geus lila diadegan wangunan Kantor Imigrasi Kelas II Sukabumi.

Hadir dina kasempetan éta, Kapala Kantor Wilayah Kamentrian Hukum jeung HAM Provinsi Jawa Barat, Drs. Libérti Sitinjak, Wakil Wali Kota Sukabumi, H. Andri S. Hamami, S.H., M.H., Ketua DPRD Kota Sukabumi, H. Kamal Suhérman, S.H., Sekertaris Daérah Kota Sukabumi, Drs. H. Dida Sembada, M.M., Asistén Pamaréntahan Setda Kota Sukabumi, Drs. H. Andri Setiawan, M.M., para Kapala OPD (Organisasi Parangkat Daérah), katut para tamu ondangan lianna.

Dina biantarana Wali Kota Sukabumi nandeskeun, disérén sumérénkeunnana tanah hibah ti Pamaréntah Kota Sukabumi ka Kamentrian Hukum jeung HAM RI téh, ngarupakeun bentuk kolaborasi jeung sinergitas antara Pamaréntah Kota Sukabumi jeung Kantor Imigrasi Kelas II Sukabumi, anu maksud jeung tujuannana pikeun ngaronjatkeun kinerja palayanan publik.

Salian ti éta, Wali Kota Sukabumi ngaharepkeun, ku ngaronjatna kinerja palayanan publik, Kantor Imigrasi Kelas II Sukabumi bisa naék status. Ěta hal téh perlu dihontal jeung diwujudkeun, pikeun mapag panghangkeutan inprastruktur, anu dina danget ieu lumangsung di wewengkon Kota Sukabumi.

Sedengkeun Kapala Kantor Wilayah Kamentrian Hukum jeung HAM Provinsi Jawa Barat ngajelaskeun, sinergitas antara Kamentrian Hukum jeung HAM katut Pamaréntah Daérah kacida pentingna dilaksanakeun, pikeun ngawujudkeun good governance. Disagédéngeun ti éta, Kapala Kantor Wilayah Kamentrian Hukum jeung HAM Provinsi Jawa Barat ogé ngajelaskeun, pihakna baris salawasna ngaronjatkeun palayanan ka masarakat, sala sahijina nya éta nyieun paspor.

Leave a Reply