PINGPINAN DPRD KOTA SUKABUMI MANGSA JABATAN TAUN 2019-2024 DIISTRÉNAN SACARA RESMI

Reporter/Redaktur/Editor : ENDANG SUMARDI

Pingpinan DPRD Kota Sukabumi mangsa jabatan taun 2019-2024, anu ngawengku ti Ketua, H. Kamal Suhérman, S.H., sarta Wakil Ketua, Jona Arizona, S.IP., M.M. katut Wawan Juanda, diistrénan sacara resmi dina Rapat Paripurna DPRD, sawatara poé ka tukang, anu lumansung di Rohangan Rapat Paripurna DPRD Kota Sukabumi.

Hadir dina kasempetan éta, Wali Kota Sukabumi, H. Achmad Fahmi, Wakil Wali Kota Sukabumi, H. Andri S. Hamami, S.H., M.H., unsur Forkopimda (Forum Komunikasi Pimpinan Daérah) Kota Sukabumi, Sekertaris Daérah Kota Sukabumi, Drs. H. Dida Sembada, M.M., para Asistén Setda Kota Sukabumi, para Kapala OPD (Organisasi Parangkat Daérah), para Camat jeung Lurah, para Alim Ulama, Inohong Masarakat, Wanoja jeung Pamuda, sarta para tamu ondangan lianna.

Dina kasempetan éta, Wali Kota Sukabumi kalayan asmana Pamaréntah Kota Sukabumi, ngawilujengkeun ka Pingpinan DPRD Kota Sukabumi, sarta ngahaturkeun nuhun ka Pingpinan Saheulaanan DPRD Kota Sukabumi, anu geus ngalaksanakeun tugas sacara hadé. Wali Kota Sukabumi ngaharepkeun, Pingpinan DPRD bisa ngajalankeun tugas jeung kinerja anu leuwih hadé deui. Sabab masarakat Kota Sukabumi nunggu tugas jeung kinerja Anggota DPRD hasil Pamilihan Legislatip Taun 2019. Salian ti éta, DPRD ngarupakeun sala sahiji pilar tina 3 pilar anu kudu sinergi sacara hadé, diantarana nguntun gawé bareng, sabilulungan, kakulawargaan jeung babarengan ngawangun Kota Sukabumi dina sagala widang.

Sedengkeun Ketua DPRD Kota Sukabumi, H. Kamal Suhérman, S.H. nandeskeun, amanah sabagé Pingpinan DPRD ngarupakeun hiji kahormatan jeung tanggungjawab anu gedé dina mangsa Otonomi Daérah. Lantaran DPRD sabagé unsur Panyalagara Pamaréntah Daérah, sarta kudu mampuh ngamekarkeun kahirupan démokrasi jeung kasajahtraan masarakat. Ku sabab kitu, Ketua DPRD Kota Sukabumi ngaharepkeun ka sakumna Anggota DPRD Kota Sukabumi, supaya bisa ngawangun kamitraan anu sinergis jeung Pamaréntah Kota Sukabumi, sarta kudu bisa ngaoptimalkeun peran jeung pungsi DPRD sacara hadé, nya éta dina ngabentuk Perda, Panganggaran jeung Pangawasan, kaasup dina usaha ngahontal visi jeung misi Kota Sukabumi.

Leave a Reply