KOTA SUKABUMI MEUNANG LAYANG PANGAJÉN KOTA LAYAK PAMUDA

Reporter/Redaktur/Editor : ENDANG SUMARDI

Kota Sukabumi meunang layang pangajén Kota Layak Pamuda Kategori Pratama, ti Kamentrian Pamuda jeung Olahraga. Ěta layang pangajén téh ditarima langsung ku Wali Kota Sukabumi, H. Achmad Fahmi, dina acara Anugrah Kapamudaan 2019, cindekna tanggal 28 Oktober 2019 nu anyar kaliwat, di Jakarta Concért Hall iNéws Tower, anu ngangkat téma Bersatu Kita Maju. Dina kasempetan éta hadir Wakil Persidén RI, K.H. Ma’ruf Amin, Mentri Pamuda jeung Olahraga Kabinét Indonésia Maju, Zainudin Amali, katut para tamu ondangan lianna.

Wali Kota Sukabumi, H. Achmad Fahmi ngajelaskeun, nurutkeun béwara nu katarima, anu meunang éta layang pangajén téh ngan ukur 10 daérah sa Indonésia. Ku sabab kitu, Wali Kota Sukabumi ngucap syukur ku meunangna éta layang pangajén ti Kamentrian Pamuda jeung Olahraga, anu ngabogaan tékad  pikeun terus mahatikeun pamuda.

Salajuna dijelaskeun, ku meunangna éta layang pangajén téh, ngarupakeun hiji tanda atawa bukti, yén Pamaréntah Kota Sukabumi mahatikeun pamuda, anu kacida pentingna dina pangwangunan di daérah. Salian ti éta ogé dijelaskeun, meunangna éta layang pangajén téh, lantaran Kota Sukabumi salawasna ngilubiungkeun kaom pamuda dina pangwangunan daérah.

Wali Kota Sukabumi ngaharepkeun, ku meunangna éta layang pangajén téh, bisa jadi pecut jeung panghudang sumanget pikeun Pamaréntah Kota Sukabumi katut instansi jeung lembaga nu aya kaitannana, pikeun salawasna mahatikeun jeung ngilubiungkeun pamuda dina pangwangunan. Maksud jeung tujuannana, malar para pamuda di Kota Sukabumi, ka hareupna bisa leuwih ngabogaan daya, leuwih parigel jeung leuwih unggul.

Disagigireun ti éta ogé dijelaskeun, program Kota Layak Pamuda téh ngarupakeun sala sahiji program jeung sistim pangwangunan kota jeung kabupatén, sakaligus pikeun  ngaronjatkeun sumber daya pamaréntah, masarakat, kulawarga jeung dunya usaha sagemblengna sarta terus-terusan. Anapon pasaratan pikeun ngawujudkeun Kota Layak Pamuda téh, diantarana kagiatan pamuda, pondok pamuda, puseur palatihan pamuda jeung tempat ngumpul pamuda.

Leave a Reply