GUBERNUR JAWA BARAT NEPIKEUN ORASI ILMIAH NGEUNAAN INDONÉSIA EMAS 2045

Reporter/Redaktur/Editor : ENDANG SUMARDI

Gubernur Jawa Barat, Ridwan Kamil, nepikeun orasi ilmiah ngeunaan Indonésia Emas 2045, dina Wisuda Sarjana jeung Pasca Sarjana STAI (Sekolah Tinggi Agama Islam) Kota Sukabumi Taun Akademik 2018-2019, di Gedong Anton Soédjarwo Setukpa Lemdiklat Polri Sukabumi, sakaligus ngaresmikeun Gedong Pascasarjana STAI Kota Sukabumi. Hadir dina kasempetan éta, Wali Kota Sukabumi, H. Achmad Fahmi, Wakil Bupati Sukabumi, Drs. H. Adjo Sardjono, M.M., unsur Forkopimda (Forum Komunikasi Pimpinan Daérah) Kota Sukabumi, para Kapala OPD (Organisasi Parangkat Daérah) kaasup instansi jeung lembaga nu aya kaitannana, sarta para tamu ondangan liana.

Dina orasina, Gubernur Jawa Barat ngaharepkeun, lulusan STAI Kota Sukabumi bisa ilubiung di Jawa Barat, sarta ngabogaan prestasi dina ngahontal tujuan Jabar Juara Lahir jeung Batin. Salian ti éta, Gubernur Jawa Barat ogé nepikeun sisindiran pikeun lulusan STAI Kota Sukabumi, nya éta Membeli moci di Sukabumi pulangnya beli kain satin, Ayo lulusan STAI berpretasi agar Jabar Juara Lahir Batin.

Sedengkeun Wali Kota Sukabumi ngajelaskeun, kahadiran Gubernur Jawa Barat dina ieu wisuda téh, nandakeun yén kampus-kampus di Kota Sukabumi kaasup STAI diajén kuat jeung ngabelesat dina dunya atikan. Salajuna dijelaskeun, dina kasempetan ieu Gubernur Jawa Barat nepikeun sagala rupa hal, hususna ngeunaan ilubiung jeung gawé bareng antara Pamaréntah Provinsi Jawa Barat katut Pamaréntah Kota jeung Kabupatén dina hal sinergitas pikeun nagri anu leuwih hadé. Disagigireun ti éta ogé dijelaskeun, Kota Sukabumi salawasna méré pahatian dina ngaronjatkeun jeung ngamekarkeun dunya atikan, sala sahijina dilaksanakeun ngaliwatan gawé bareng jeung sakumna élemén masarakat.

Saréngséna nepikeun orasi jeung ngaresmikeun Gedong Pascasarjana STAI Kota Sukabumi, Gubernur Jawa Barat katut rombongan ngaluuhan Wisuda Tahfidz Al-Qur’an Adzkia, di Masjid Al-Muttaqin Setukpa Lemdiklat Polri Sukabumi. Dina kasempetan éta Gubernur Jawa Barat ngajelaskeun, Pamaréntah Provinsi Jawa Barat keur ngagulirkeun program satiap désa jeung kalurahan di Jawa Barat nyitak saurang hafidz Al-Qur’an, nya éta aya 6 rébu désa jeung kalurahan kaasup di Kota Sukabumi. Sedengkeun Wali Kota Sukabumi nandeskeun, Pamaréntah Kota Sukabumi siap ngarojong jeung ngalaksanakeun éta program.

Leave a Reply