KU AYANA MOCI KPU BISA NGARONJATKEUN AJÉN DÉMOKRASI

Reporter/Redaktur/Editor : ENDANG SUMARDI

Wali Kota Sukabumi, H. Achmad Fahmi ngaharepkeun, ku ayana Moci (Mobil Cedas Démokrasi) KPU (Komisi Pamilihan Umum) Kota Sukabumi, bisa ngaronjatkeun ajén démokrasi di Kota Sukabumi, anu ditandaan ku undakna tingkat ilubiung pamilih dina satiap pésta démokrasi, boh dina Pilkada boh dina Pamilu DPR katut Persidén. Lian ti éta, Pamaréntah Kota Sukabumi salawasna ngarojong kana undakna ajén démokrasi di Kota Sukabumi.

Harepan éta téh ditepikeun basa ngaresmikeun Moci KPU Kota Sukabumi, cindekna di hareupeun Balé Kota Sukabumi. Hadir dina kasempetan éta, para Kapala OPD (Organisasi Parangkat Daérah) jeung instansi nu aya tumalina, sarta para tamu ondangan séjénna.

Salajuna dijelaskeun, sanggeus palaksanaan Pamilu DPR jeung Persidén, tugas KPU dianggap réngsé. Ngan gawé jeung hasil gawé KPU kudu dironjatkeun ti waktu ka waktuna. Salian ti éta ogé dijelaskeun, ku ayana Moci KPU téh, éta hal bisa diwujudkeun sacara hadé, malar Kota Sukabumi bisa jadi bagian panyalagaraan Pamilu anu perséntaseuna pang gedéna di Jawa Barat.

Disagigireun ti éta ogé dijelaskeun, danget ieu cikal bakalna di Kota Sukabumi geus muncul, nya éta ku ayana TPS anu jadi perséntaseu pamilihna pang réana sa Jawa Barat, sarta meunang pangajen ti Gubernur Jawa Barat.

Wali Kota Sukabumi ngaharepkeun, ku ayana Moci KPU Kota Sukabumi téh bisa ngaronjatkeun sosialisasi ka masarakat ti ayeuna, sangkan masarakat apal kana tugas KPU, nya éta nyiiapkeun Pamilu pariodeu saterusna. Disagédéngeun ti éta, masarakat ogé meunang béwara ngeunaan pentingna ilubiung masarakat dina Pamilu. Salajuna KPU ogé bisa méré ilham ka masarakat, pikeun ngahadirkeun jeung ngawujudkeun Pamilu anu santun jeung silih hargaan.

Satuluyna Wali Kota Sukabumi ngajelaskeun, dumasar kana béwara ti KPU Kota Sukabumi, Moci KPU téh ngarupakeun mobil keur ngalaksanakeun sosialisasi ka masyarakat, pikeun ngaronjatkeun ilubiung pamilih, boh tina sisi ajénna boh tina sisi réana dina sakumna prosés panyalagaraan Pamilu. Lian ti éta, ogé bisa jadi puseur béwara ngeunaan kapamiluan kadua, sanggeus Imah Pinter Pamilu.

Leave a Reply