DUA RW DI KOTA SUKABUMI MEUNANG LAYANG PANGAJÉN ÉCOVILLAGE JEUNG KAMPUNG IKLIM

Reporter/Redaktur/Editor : ENDANG SUMARDI

Dua RW di Kota Sukabumi meunang layang pangajén Écovillage jeung Kampung Iklim, nya éta RW 02 Kalurahan Jayamekar Kacamatan Baros meunang layang pangajén Écovillage jeung Program Kampung Iklim Kategori Utama, sarta RW 08 Kalurahan Baros Kacamatan Baros meunang layang pangajén Program Kampung Iklim Kategori Utama.

Éta layang pangajén téh dipasrahkeun dina acara puncak pangéling-ngéling HHD (Hari Habitat Dunya) jeung HKT (Hari Kota Dunya) Taun 2019, anu dipuseurkeun di kawasan Wisata Waduk Jatiluhur Kabupatén Purwakarta.

Hadir dina kasempetan éta, Mentri PUPR (Pekerjaan Umum jeung Perumahan Rakyat), Basuki Hadimuljono, Wakil Gubernur Jawa Barat, H. Uu Ruzhanul Ulum, Wali Kota Sukabumi, H. Achmad Fahmi, sarta para Bupati katut Wali Kota lianna di Jawa Barat.

Wali Kota Sukabumi ngajelaskeun, ku meunangna éta layang pangajén téh jadi sala sahiji bukti, yén pamaréntah jeung masarakat Kota Sukabumi salawasna paduli kana kaayaan lingkungan.

Salajuna dijelaskeun, dina hal écovillage atawa konsép tata rohang jeung wilayah, pamaréntah salawasna ngadorong désa atawa kampung anu ngabogaan budaya lingkungan jeung inovasi dina pangalolaan runtah, sarta masarakatna mampuh ngalola lingkungannana luyu jeung kaidah anu dilaksanakeun sacara terus-terusan, anu ngawengku konsérvasi, pamangpaatan jeung pamulihan lingkungan. Sabab écovillge téh sabagai bentuk interaksi manusa kana lingkungan, pikeun ngahontal kahirupan anu terus-terusan jeung kalestarian lingkungan.

Disagigireun ti éta ogé dijelaskeun, masarakat geus usaha pikeun ngungkulan parobahan iklim sacara hadé. Diantarana ku cara ngamangpaatkeun buruan imah ku dipelakan sayuran atawa taneman obat-obatan. Lian ti éta, ogé nyieun lombang biopori saeutikna hiji imah hiji lombang biopori pikeun nyerep cai hujan.

Saterusna dijelaskeun, ka hareup Pamaréntah Kota Sukabumi baris ngadorong masarakat di daérah lianna di Kota Sukabumi, pikeun salawasna mahatikeun jeung madulikeun kaayaan lingkungannana masing-masing. Sabab ku éta hal téh, panataan pakotaan di wewengkon Kota Sukabumi baris ngabogaan wawasan lingkungan. (Sumber Bagian Humas jeung Protokol Setda Kota Sukabumi).

Leave a Reply